അബുദാബിയില്‍ പാചകവാതക സംഭരണി പൊട്ടിത്തെറിച്ച് മരിച്ചവരില്‍ മലയാളിയും

അബുദാബിയിലെ റസ്റ്റോറന്റില്‍ ഗ്യാസ് സിലിണ്ടര്‍ പൊട്ടിത്തെറിച്ചുണ്ടായ അപകടത്തില്‍ മരിച്ച രണ്ടു പേരില്‍ ഒരാള്‍ മലയാളി. ആലപ്പുഴ സ്വദേശി ശ്രീകുമാറാണ് (43) മരിച്ചതെന്ന് ഇന്ത്യന്‍ എംബസി അറിയിച്ചു. അപകടത്തില്‍ 120 പേര്‍ക്ക് പരുക്കേറ്റിരുന്നു. ഇവര്‍ക്ക് വിദഗ്ധ ചികിത്സ ലഭ്യമാക്കുന്നതായി അധികൃതര്‍ അറിയിച്ചു. അല്‍ ഖാലിദിയയില്‍ കഴിഞ്ഞദിവസമാണ് പാചകവാതക സംഭരണി പൊട്ടിത്തെറിച്ച് അപകടമുണ്ടായത്. ഇതില്‍ മരിച്ച രണ്ടുപേരില്‍ ഒരാള്‍ മലയാളിയാണെന്ന് അധികൃതര്‍ സ്ഥിരീകരിച്ചു. ആലപ്പുഴ സ്വദേശി ശ്രീകുമാറാണ് മരിച്ചത് എന്ന് ഇന്ത്യന്‍ എംബസി വ്യക്തമാക്കി. പരുക്കേറ്റവരില്‍ 106 പേര്‍ ഇന്ത്യക്കാരാണെന്നും എംബസി കൂട്ടിച്ചേര്‍ത്തു. മരിച്ച മറ്റൊരാള്‍ പാകിസ്താന്‍ സ്വദേശിയാണ്. തിങ്കളാഴ്ച ഉച്ചയ്ക്ക് ഉണ്ടായ അപകടത്തില്‍ 120 പേര്‍ക്കാണ് പരുക്കേറ്റത്. സാരമായി പരുക്കേറ്റ 56 പേര്‍ വിവിധ ആശുപത്രികളില്‍ സുഖം പ്രാപിച്ചു വരികയാണ്. ഇവരെ അബുദാബി ആരോഗ്യ വിഭാഗം അധികൃതര്‍ കഴിഞ്ഞ ദിവസം സന്ദര്‍ശിച്ചിരുന്നു. അപകടത്തില്‍ മലയാളികളുടെ ഉടമസ്ഥിതിയിലുള്ള റസ്റ്റോറന്റ് പൂര്‍ണമായി തകരുകയും, സമീപത്തെ 6 കെട്ടിടങ്ങള്‍ക്ക് നാശനഷ്ടം ഉണ്ടാവുകയും ചെയ്തിട്ടുണ്ട്.