റിട്ട. അധ്യാപികയെ വധിച്ച കേസില്‍ ശിഷ്യന്‍മാരായ രണ്ട് പേര്‍ക്ക് ജീവപര്യന്തം

കാസര്‍കോട് ചീമേനി പുലിയന്നൂരില്‍ റിട്ട.അധ്യാപിക പി.വി.ജാനകി(65)യെ കഴുത്തറുത്തു കൊലപ്പെടുത്തി പണവും ആഭരണവും കവര്‍ന്ന കേസില്‍ രണ്ട് പേര്‍ക്ക് ജീവപര്യന്തം. പുലിയന്നൂര്‍ ചീര്‍ക്കുളം വലിയവീട്ടില്‍ വിശാഖ്(31), ചീര്‍ക്കുളം അള്ളറാട്ട് ഹൗസില്‍ അരുണ്‍കുമാര്‍(29) എന്നിവരെയാണു ജീവപര്യന്തം ശിക്ഷയ്ക്ക് വിധിച്ചത്. രണ്ടാം പ്രതി പുലിയന്നൂര്‍ ചീര്‍ക്കുളം തലക്കാട്ട് ഹൗസില്‍ ടി.റെനീഷിനെ(24) വെറുതേ വിട്ടിരുന്നു. 2017 ഡിസംബര്‍ 13നു രാത്രി 9.30നാണ് മുഖംമൂടി അണിഞ്ഞ സംഘം വീട്ടില്‍ കയറി ജാനകിയെ കഴുത്തറുത്തു കൊലപ്പെടുത്തിയ ശേഷം ഭര്‍ത്താവ് റിട്ട.അധ്യാപകന്‍ കളത്തേര കൃഷ്ണനെ(74) ഗുരുതരമായി പരുക്കേല്‍പ്പിച്ച് 17 പവന്‍ ആഭരണവും 92,000 രൂപയുമായി കടന്നു കളഞ്ഞത്. കൊലപാതകം, കവര്‍ച്ച, ഭവനഭേദനം, ഗൂഢാലോചന, വധശ്രമം എന്നീ കുറ്റങ്ങളാണ് പ്രതികള്‍ക്കെതിരെ തെളിഞ്ഞത്. രണ്ടാം പ്രതിക്കെതിരെ ചുമത്തിയ കുറ്റങ്ങള്‍ തെളിയിക്കാന്‍ പ്രോസിക്യൂഷനു സാധിച്ചില്ല. ജാനകി പഠിപ്പിച്ച ശിഷ്യന്മാരാണ് പ്രതികള്‍. 2019 ഡിസംബറില്‍ വിചാരണ പൂര്‍ത്തിയായെങ്കിലും ജഡ്ജിമാരുടെ സ്ഥലം മാറ്റവും കോവിഡും കാരണം വിധി പറയാന്‍ വൈകുകയായിരുന്നു. വിചാരണ ആരംഭിച്ച ശേഷം ആറാമത്തെ ജഡ്ജിക്കാണ് വിധി പറയാന്‍ അവസരം ഉണ്ടായത്. കവര്‍ച്ച നടത്തിയ സ്വര്‍ണം ഉരുക്കിയ നിലയില്‍ കണ്ണൂര്‍, മംഗളൂരു എന്നിവിടങ്ങളിലെ ജ്വല്ലറികളില്‍ നിന്നാണ് പൊലീസ് കണ്ടെടുത്തത്. മൊബൈല്‍ ടവര്‍ ലൊക്കേഷന്‍ പരിശോധിച്ചതാണു സ്വര്‍ണം വില്‍ക്കാന്‍ പോയ സ്ഥലം തിരിച്ചറിയാനും പ്രതികളെ കണ്ടെത്താനും സഹായിച്ചത്. ജില്ലാ പൊലീസ് മേധാവിയായിരുന്ന കെ.ജി.സൈമണിന് ആയിരുന്നു കേസ് അന്വേഷണത്തിന്റെ മേല്‍നോട്ടം.