കൂട്ടബലാത്സംഗം: കാറില്‍നിന്ന് സ്രവവും മുടിയും കണ്ടെടുത്തു; ‘കാര്‍ കഴുകി വൃത്തിയാക്കി’

ഹൈദരാബാദ്:പ്രായപൂര്‍ത്തിയാകാത്ത പെണ്‍കുട്ടിയെ കാറില്‍ കൂട്ടബലാത്സംഗം ചെയ്ത കേസിലെ പ്രതികള്‍ തെളിവു നശിപ്പിക്കാന്‍ ശ്രമിച്ചതായി പൊലീസ്. പ്രായപൂര്‍ത്തിയാകാത്ത മൂന്നു പേരടക്കം അഞ്ചു പേരാണ് കേസിലെ പ്രതികള്‍. ഇവര്‍ കുറ്റകൃത്യത്തിനു ശേഷം കാര്‍ കഴുകി വൃത്തിയാക്കിയെന്നും പൊലീസ് പറഞ്ഞു. എന്നാല്‍ കാറില്‍നിന്നും ചില സുപ്രധാന തെളിവുകള്‍ കണ്ടെത്താനായെന്ന് പൊലീസ് അറിയിച്ചു. കാറില്‍നിന്ന് കണ്ടെടുത്ത സ്രവം, മുടി, കമ്മലുകള്‍, ചെരുപ്പ് എന്നിവ ഫോറന്‍സിക് പരിശോധനയ്ക്ക് അയച്ചതായി പൊലീസ് അറിയിച്ചു. ഇതോടെ പ്രതികള്‍ക്കെതിരെ തെളിവു നശിപ്പിച്ചതിന് ഐപിസി സെക്ഷന്‍ 201 ചുമത്തി വേറെ കേസെടുത്തു. മേയ് 28നാണ് പബില്‍ നിന്നിറങ്ങിയ പെണ്‍കുട്ടിയെ (17) ബന്‍ജാര ഹില്‍സിനു സമീപമുള്ള ഒറ്റപ്പെട്ട പ്രദേശത്ത് പാര്‍ക്ക് ചെയ്തിരുന്ന കാറില്‍ വച്ചാണു പീഡിപ്പിച്ചത്. സംഭവത്തിനുശേഷം പെണ്‍കുട്ടിയെ പബിനു മുന്നില്‍ ഇറക്കിവിടുകയും പെണ്‍കുട്ടി പിതാവിനെ വിളിച്ചു വരുത്തുകയുമായിരുന്നു. കേസുമായി ബന്ധപ്പെട്ട് നാലു പേര്‍ അറസ്റ്റിലായിരുന്നു. ഇതില്‍ ഒരാള്‍ മുഖ്യമന്ത്രി കെ.ചന്ദ്രശേഖര്‍ റാവുവിന്റെ പാര്‍ട്ടിയായ തെലങ്കാന രാഷ്ട്ര സമിതിയുടെ പ്രാദേശിക നേതാവിന്റെ മകനാണ്. അഞ്ചാം പ്രതിക്കായി തിരച്ചില്‍ തുടരുകയാണ്. രണ്ടു കാറുകളും കഴിഞ്ഞ ദിവസം പൊലീസ് പിടിച്ചെടുത്തു.