കാറും സ്വകാര്യ ബസ്സും കൂട്ടിമുട്ടി കാർ യാത്രികൻ മരിച്ചു

കോഴഞ്ചേരി: തിരുവല്ല- കുമ്പഴ സംസ്ഥാന പാതയിൽ കുമ്പനാടിന് സമീപം മുട്ടുമണ്ണിൽ കാറും സ്വകാര്യ ബസ്സും കൂട്ടിമുട്ടി കാർ യാത്രക്കാരനായ പുറമറ്റം മുണ്ടമല പുളിമൂട്ടിൽ തോമസ് ജേക്കബ്ബ് ( രാജു പുളിമൂട്ടിൽ-70) മരിച്ചു. ശനിയാഴ്ച്ച രാവിലെ 7.30 ന് ആയിരുന്നു അപകടം. കോഴഞ്ചേരി ഭാഗത്തേക്ക് പോയ വാഗൺ ആർ കാറിൽ എതിരെ വന്ന കോഴഞ്ചേരി-കവിയൂർ- ചങ്ങനാശ്ശേരി റൂട്ടിലോടുന്ന സ്വകാര്യ ബസ്സ് ഇടിക്കുകയായിരുന്നു.തോമസ് ജേക്കബ്ബ് ആയിരുന്നു കാർ ഓടിച്ചിരുന്നത്. ഇടിയുടെ ആഘാതത്തിൽ കാറിന്റെ ഭാഗം തകർന്ന് എയർ ബാഗുകൾ തുറന്നിരുന്നു. നാട്ടുകാർ ഓടിയെത്തിയാണ് കാറിൽ നിന്നും ആളെ പുറത്തെടുത്തത്. മുൻ കർഷക കോൺഗ്രസ് പത്തനംതിട്ട ജില്ലാ പ്രസിഡണ്ട്, മാരാമൺ കൺ വെൻഷന്റെ സംഘാടക സമിതിയായ മാർത്തോമ്മാ സുവിശേഷ പ്രസംഗ സംഘം ട്രഷറർ, ജില്ലാ കാർഷിക വികസന സമിതി അംഗം, പുറമറ്റം ഗ്രാമപഞ്ചായത്ത് മുൻ അംഗം തുടങ്ങിയ നിലകളിൽ പ്രവർത്തിച്ചിട്ടുണ്ട്. നിലവിൽ CPIM പുറമറ്റം ലോക്കൽ കമ്മിറ്റിയംഗവും തെള്ളിയൂർ കൃഷി വിജ്ഞാന കേന്ദ്രം നിയന്ത്രണത്തിലുള്ള പ്രിമിനെൻറ് ആഗ്രോ ഫാർമർ പ്രൊഡൂസർ കമ്പിനി MD യുമാണ്. പുറമറ്റം ഗ്രാമ പഞ്ചായത്ത് വൈസ് പ്രസിഡണ്ട് ശോശാമ്മ തോമസ് ഭാര്യയാണ്.മക്കൾ: അരുൺ പി.തോമസ് (ദോഹ), അഞ്ജു കുര്യൻ( പട്ടം സെൻറ് തോമസ് സ്കൂൾ, തിരുവനന്തപുരം). മരുമക്കൾ: ഡോണ എലിസബത്ത് മാത്യു, ടെസ്സിൻ കുര്യൻ. മൃതദേഹം കുമ്പനാട് ഫെല്ലോഷിപ്പ് ആശുപത്രി മോർച്ചറിയിൽ. തുടർച്ചയായ രണ്ടാം ദിവസമാണ് ടി.കെ റോഡിൽ അടുത്തടുത്ത സ്ഥലങ്ങളിൽ ഉണ്ടായ അപകടങ്ങളിൽ രണ്ട് മരണങ്ങൾ സംഭവിച്ചത്. കഴിഞ്ഞ ദിവസം ഇരവിപേരൂരിൽ സ്കൂട്ടർ യാത്രിക അമിത വേഗത്തിൽ വന്ന ടിപ്പർ കയറി മരിച്ചിരുന്നു. ടി.കെ. റോഡ് ഉന്നത നിലവാരത്തിൽ നവീകരിച്ചതിന് ശേഷം വാഹനങ്ങൾ അമിത വേഗതയിലാണ് സഞ്ചരിക്കുന്നത് എന്ന് വ്യാപക പരാതിയുണ്ട്.