കറുത്ത മാസ്‌ക് ധരിക്കാന്‍ വിലക്കില്ല: വിശദീകരിച്ച് മുഖ്യമന്ത്രിയുടെ ഓഫിസ്

തിരുവനന്തപുരം: മുഖ്യമന്ത്രി പിണറായി വിജയന്റെ പൊതുപരിപാടിയില്‍ കറുത്ത മാസ്‌കിനു വിലക്കേര്‍പ്പെടുത്തിയിട്ടില്ലെന്ന് അദ്ദേഹത്തിന്റെ ഓഫിസ് അറിയിച്ചു. കറുത്ത മാസ്‌ക് ധരിച്ചവര്‍ക്ക് വിലക്കേര്‍പ്പെടുത്തിയെന്ന മാധ്യമ വാര്‍ത്തകള്‍ സംബന്ധിച്ചാണു പ്രതികരണം. കറുത്ത മാസ്‌ക് ധരിച്ചെത്തിയ മാധ്യമപ്രവര്‍ത്തകരോട് മാസ്‌ക് മാറ്റാന്‍ നിര്‍ദേശിച്ചതും, മുഖ്യമന്ത്രി പങ്കെടുക്കുന്ന പരിപാടിയില്‍ കറുത്ത വേഷത്തിന് വിലക്ക് ഏര്‍പ്പെടുത്തിയതും കടുത്ത പ്രതിഷേധത്തിനിടയാക്കിയിരുന്നു. കലൂരില്‍ കറുത്ത വസ്ത്രം ധരിച്ചെത്തിയ ട്രാന്‍സ്‌ജെന്‍ഡറുകളെ പൊലീസ് കസ്റ്റഡിയിലെടുത്തതു വിവാദമായി. മെട്രോയില്‍ യാത്ര ചെയ്യാനെത്തിയതായിരുന്നു ഇവര്‍. പ്രതിഷേധിക്കാന്‍ വന്നതല്ലെന്ന് പറഞ്ഞിട്ടും ബലം പ്രയോഗിച്ച് കസ്റ്റഡിയിലെടുക്കുകയായിരുന്നു.