വിജിലന്‍സ് മേധാവിയെ മാറ്റിയത് ആക്ഷേപം ഉയര്‍ന്നതിനാല്‍: കോടിയേരി

തിരുവനന്തപുരം: വിജിലന്‍സ് മേധാവി എഡിജിപി എം.ആര്‍.അജിത് കുമാറിനെ തല്‍സ്ഥാനത്ത് നിന്ന് നീക്കിയത് ആക്ഷേപം ഉയര്‍ന്നതിനാലാണെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍. ആരോപണങ്ങളില്‍ അന്വേഷണം വേണം എന്ന് തീരുമാനിക്കേണ്ടത് സര്‍ക്കാരാണ്, പാര്‍ട്ടിയല്ല. കലാപം ഉണ്ടാക്കാന്‍ ശ്രമിച്ചാല്‍ ജനങ്ങളെ അണിനിരത്തി നേരിടുമെന്നും അദ്ദേഹം പറഞ്ഞു. സ്വര്‍ണക്കടത്തുകേസ് പ്രതി സ്വപ്ന സുരേഷുമായി അജിത് കുമാര്‍ വാട്‌സാപ് കോള്‍ വിളിച്ച വിവരം പുറത്തുവന്നിരുന്നു. ഇക്കാര്യം സ്വപ്ന വെളിപ്പെടുത്തുകയും ഇടനിലക്കാരനായി എത്തിയ ഷാജ് കിരണ്‍ സ്ഥിരീകരിക്കുകയും ചെയ്തിരുന്നു. ഇതിനു പിന്നാലെയാണ് അജിത് കുമാറിനെ തല്‍സ്ഥാനത്ത് നിന്ന് നീക്കിയത്. അതേസമയം, മുഖ്യമന്ത്രിയുടെ സുരക്ഷ ഉയര്‍ത്തിയതിനെ കുറിച്ചുള്ള ചോദ്യങ്ങള്‍ക്ക് മുഖ്യമന്ത്രി ആയത് കൊണ്ടാണ് സുരക്ഷ നല്‍കുന്നതെന്ന് എല്‍ഡിഎഫ് കണ്‍വീനര്‍ ഇ.പി.ജയരാജന്‍ പറഞ്ഞു. മുഖ്യമന്ത്രിയുടെ സന്ദര്‍ശനത്തോടനുബന്ധിച്ച് കോട്ടയം ജില്ലയില്‍ സുരക്ഷ ശക്തമാക്കിയതിനെ കുറിച്ചാണ് അദ്ദേഹത്തിന്റെ പ്രതികരണം.