സ്വര്‍ണക്കട്ടി എന്ന വ്യാജേന ഗോളകം നല്‍കി തട്ടിപ്പ്; മലപ്പുറത്ത് മൂന്നുപേര്‍ അറസ്റ്റില്‍

കോടികള്‍ വിലവരുന്ന സ്വര്‍ണക്കട്ടിയെന്ന വ്യാജേന സ്വര്‍ണനിറമുള്ള ഗോളകം നല്‍കി തട്ടിപ്പ് നടത്തിയ കേസില്‍ മൂന്നുപേര്‍ അറസ്റ്റില്‍. കൊണ്ടോട്ടി നെടിയിരിപ്പ് സ്വദേശി കൂനംവീട്ടില്‍ ഹമീദ് എന്ന ജിം ഹമീദ് (51), ഗൂഡല്ലൂര്‍ സ്വദേശികളായ കൈപ്പഞ്ചേരി സൈതലവി (40), കുഴിക്കലപറമ്പ് അപ്പു എന്ന അഷ്‌റഫ് (55) എന്നിവരാരെയാണ് പൊന്നാനി പൊലീസ് അറസ്റ്റ് ചെയ്തത് കായംകുളം പള്ളിയിലെ ഇമാമായ ചാലിശ്ശേരി സ്വദേശി നല്‍കിയ പരാതിയിലാണ് മൂവരെയും അറസ്റ്റ് ചെയ്തത്. മുസ്‌ലിയാര്‍മാരുടെയും പണിക്കന്മാരുടെയും ഫോണ്‍ നമ്പറുകള്‍ ശേഖരിച്ച് അവരെ വിളിച്ച് വിശ്വാസ്യത നേടിയാണ് സംഘം തട്ടിപ്പിന് കളമൊരുക്കുന്നത്. തങ്ങളുടെ വീട്ടുപറമ്പില്‍നിന്ന് സ്വര്‍ണക്കട്ടി ലഭിച്ചിട്ടുണ്ടെന്നും രണ്ടുകോടിയോളം രൂപ വിലവരുന്ന സാധനം നിങ്ങള്‍ മുഖേന വില്‍ക്കാന്‍ താല്‍പര്യമുണ്ടെന്നും മുസ്‌ലിയാര്‍മാരെയും പണിക്കന്മാരെയും അറിയിക്കും. തുടര്‍ന്ന് അഡ്വാന്‍സ് തുകയുമായി എത്തണമെന്നും സ്വര്‍ണം കൈമാറാമെന്നും പറഞ്ഞ് ഇടപാട് ഉറപ്പിക്കും. സംഘം പറഞ്ഞ സ്ഥലത്ത് എത്തിയാല്‍ പൊതിഞ്ഞ നിലയിലുള്ള ഗോളകത്തിന്റെ ഒരുഭാഗത്ത് ദ്വാരമുണ്ടാക്കി അതില്‍നിന്ന് സ്വര്‍ണം അടര്‍ന്നുവീഴുന്നതായി കാണിക്കും. കൈയില്‍ കരുതിയ ഒറിജിനല്‍ സ്വര്‍ണ തരിയാണ് ഈ സമയം സംഘം താഴേക്ക് ഇടുക. തരി പരിശോധിച്ച് സ്വര്‍ണമെന്ന് ബോധ്യപ്പെടുന്ന പാര്‍ട്ടിക്ക് വ്യാജ സ്വര്‍ണ ഗോളകം കൈമാറും. പിന്നീട് തുറന്നുനോക്കുമ്പോഴാണ് തട്ടിപ്പ് ബോധ്യപ്പെടുക. ഇത്തരത്തില്‍ സംസ്ഥാനത്തിന്റെ വിവിധയിടങ്ങളില്‍ നിരവധി പേരില്‍നിന്ന് പണം തട്ടിയതായി പൊന്നാനി സി.ഐ വിനോദ് വലിയാറ്റൂര്‍ പറഞ്ഞു. കായംകുളം പള്ളിയിലെ ഇമാമിനെ പൊന്നാനിയിലേക്ക് വിളിച്ചുവരുത്തി ഏഴുലക്ഷം രൂപ സമാനമായ രീതിയില്‍ തട്ടിയെടുത്തിരുന്നു. ഇതേ തുടര്‍ന്ന് ഇയാള്‍ പൊന്നാനി പൊലീസില്‍ പരാതി നല്‍കി. പൊലീസ് പ്രത്യേക അന്വേഷണ സംഘം രൂപവത്കരിച്ച് അന്വേഷണം ആരംഭിച്ചു. ഇതേസമയം, കൊടുങ്ങല്ലൂരിലുള്ള മുസ്‌ലിയാരെ തട്ടിപ്പിന് വിധേയനാക്കാന്‍ ശ്രമിക്കുന്നതായി വിവരം ലഭിച്ചു. കൊടുങ്ങല്ലൂരിലെ മുസ്‌ലിയാര്‍ക്ക് നിലമ്പൂരില്‍വെച്ച് സ്വര്‍ണക്കട്ടി കൈമാറാമെന്ന് തട്ടിപ്പ് സംഘം അറിയിച്ചതിനെ തുടര്‍ന്ന് നിലമ്പൂരില്‍ മഫ്ടിയിലെത്തിയ അന്വേഷണ സംഘം പ്രതികളെ പിടികൂടുകയായിരുന്നു.