ആലുവ കൂട്ടക്കൊല കേസ് പ്രതി ആന്റണി പരോളില്‍ പുറത്തിറങ്ങി

തിരുവനന്തപുരം: ആലുവ കൂട്ടക്കൊലകേസിലെ പ്രതി ആന്റണിക്ക് ഒടുവില്‍ പരോള്‍. പതിനെട്ട് വര്‍ഷത്തെ ജയില്‍വാസത്തിനിടയില്‍ ആദ്യമായി ആന്റണി സര്‍ക്കാരാണ്പരോള്‍ അനുവദിച്ചത്. പിന്നീട് നിരവധി തവണ ആന്റണി പരോള്‍ അപേക്ഷ നല്‍കിയിരുന്നെങ്കിലും സര്‍ക്കാര്‍ പരിഗണിച്ചിരുന്നില്ല. കേരളത്തെ നടുക്കിയ ആലുവ കൂട്ടക്കൊലകേസിലെ ഏക പ്രതിയാണ് ആന്റണി. മണിക്കൂറുകളുടെ ഇടവേളകളില്‍ ഒരു കുടുംബത്തയാകെ ഇല്ലാതാക്കിയ കേസില്‍ 18 വര്‍ഷമായി ജയിലില്‍ കഴിയുന്ന ആന്റണിക്ക് ഒടുവില്‍ 30 ദിവസത്തെ പരോള്‍. വര്‍ഷങ്ങളായി ജയിലില്‍ കഴിഞ്ഞിട്ടും പൊലീസ് റിപ്പോര്‍ട്ട് എതിരായതിനാല്‍, പരോള്‍ കിട്ടാതെ പോയ 23 പേര്‍ക്ക് സര്‍ക്കാര്‍ പരോള്‍ അനുവദിക്കാന്‍ തീരുമാനിച്ചിരുന്നു.ഇതിനെ തുടര്‍ന്നാണ് ആന്റണിക്കും പരോള്‍ കിട്ടിയത്. 2001 ജൂണ്‍ ആറിനാണ് കേരള മനസാക്ഷിയെ മരവിപ്പിച്ച ആലുവ കൂട്ടക്കൊലപാതകം നടന്നത്. ആലുവ നഗരഹൃയത്തിലെ മാഞ്ഞൂരാന്‍ വീട്ടില്‍ അഗസ്റ്റിന്‍, ഭാര്യ മേരി, മക്കള്‍ ദിവ്യ, ജെസ്‌മോന്‍, അഗസ്റ്റിന്റെ അമ്മ ക്ലാര, കൊച്ചുറാണി എന്നിവരെയാണ് ആന്റണി കൊലപ്പെടുത്തിയത്. കൊച്ചുറാണി പണം നല്‍കാമെന്ന് പറഞ്ഞിട്ട് ഒഴിഞ്ഞതിലെ വൈരാഗ്യമായിരുന്നു കൂട്ടക്കൊലയിലേക്ക് നയിച്ചത്. കൊലയ്ക്ക് ശേഷം സൗദിയിലേക്ക് രക്ഷപ്പെട്ട ആന്റണിയെ കേരളത്തിലേക്ക് എത്തിച്ച് 2001 ജൂലൈ 18ന് അറസ്റ്റ് രേഖപ്പെടുത്തി. പിന്നീട് സിബിഐ ഏറ്റെടുത്ത കേസില്‍ 2006ല്‍ ഹൈക്കോടതി ആന്റണിക്ക് തൂക്കുമരണം വിധിച്ചു. 2018ല്‍ സുപ്രീംകോടതി വധശിക്ഷ ജീവപര്യന്തമാക്കി ഇളവ് അനുവദിക്കുകയായിരുന്നു. പരോള്‍ അനുവദിച്ചതിനെ തുടര്‍ന്ന് പൂജപ്പുര സെന്‍ട്രല്‍ ജയിലില്‍ സഹോദരനെത്തി ആന്റണിയെ കൂട്ടിക്കൊണ്ടുപോയി. പരോള്‍ വ്യവസ്ഥ അനുസരിച്ച് ജൂലൈ 17ന് ആന്റണി ജയിലില്‍ തിരിച്ചെത്തണം.