കണ്ണൂരില്‍ നിയന്ത്രണം വിട്ട പിക്കപ്പ് വാന്‍ ഇടിച്ച് രണ്ട് മരണം; ചായക്കടയിലേക്ക് പാഞ്ഞുകയറി

പാപ്പിനിശ്ശേരി: കണ്ണൂരില്‍ നിയന്ത്രണം വിട്ട പിക്കപ്പ് വാന്‍ ഇടിച്ചു രണ്ട് പേര്‍ മരിച്ചു. ഒരാള്‍ക്ക് ഗുരുതരമായി പരുക്കേറ്റു. ഇന്ന് രാവിലെ ഏഴിനാണ് അപകടം. പിലാത്തറ - പാപ്പിനിശ്ശേരി കെഎസ്ടിപി റോഡില്‍ കെ.കണ്ണപുരം പാലത്തിന് സമീപമാണ് അപകടമുണ്ടായത്. കെ.കണ്ണപുരം യോഗശാല സിആര്‍സി റോഡ് ഓട്ടോറിക്ഷ ഡ്രൈവര്‍ മുക്കോത്ത് നൗഫല്‍ (35), പാപ്പിനിശ്ശേരി വെസ്റ്റിലെ സമദ് (65)എന്നിവരാണ് മരിച്ചത്. പരുക്കേറ്റ കെ.കണ്ണപുരം സ്വദേശിയുടെ നില ഗുരുതരമാണ്. പഴയങ്ങാടി ഭാഗത്തു നിന്നും വന്ന പിക്കപ്പ് വാന്‍ കണ്ണപുരം പാലത്തിലെ ഇറക്കത്തില്‍ നിയന്ത്രണം വിടുകയായിരുന്നു. റോഡരികില്‍ നില്‍ക്കുകയായിരുന്ന ഓട്ടോ ഡ്രൈവറെയും സ്‌കൂട്ടര്‍ യാത്രക്കാരനെയും ഇടിച്ച് തെറിപ്പിച്ചു. തുടര്‍ന്ന് സമീപത്തെ ചായക്കടയിലേക്ക് പാഞ്ഞു കയറിയതിനു ശേഷം വൈദ്യുതിത്തൂണില്‍ ഇടിച്ചു നിന്നു. റോഡരികില്‍ നിര്‍ത്തിയിട്ടിരുന്ന നാല് ഇരുചക്രവാഹനങ്ങള്‍ക്കും ഓട്ടോറിക്ഷയ്ക്കും കേടുപാടുകള്‍ പറ്റി. ഡ്രൈവര്‍ ഉറങ്ങിപ്പോയതാണ് അപകട കാരണമെന്നു നാട്ടുകാര്‍ പറഞ്ഞു.