കണ്ണൂരില്‍ വയോധികയെ ചുറ്റികകൊണ്ട് തലക്കടിച്ച് വീഴ്ത്തി മോഷണം; പ്രതി പിടിയില്‍

തളിപ്പറമ്പില്‍ വീട്ടില്‍ തനിച്ചായിരുന്ന വയോധികയെ ചുറ്റിക കൊണ്ട് തലക്കടിച്ച് വീഴ്ത്തി മൂന്നരപവന്റെ മാലയുമായി രക്ഷപ്പെട്ട പ്രതി പിടിയില്‍. ചുഴലി വളക്കൈ സ്വദേശി എം. അബ്ദുല്‍ ജബ്ബാര്‍ (51) ആണ് അറസ്റ്റിലായത്. കുറുമാത്തൂര്‍ കീരിയാട് തളിയന്‍ കാര്‍ത്ത്യായനി (73)യുടെ മാലയാണ് കവര്‍ന്നത്. വ്യാഴാഴ്ച ഉച്ചയോടെയായിരുന്നു സംഭവം. മരുന്നു വില്‍ക്കാനെന്ന വ്യാജേന വീട്ടിലെത്തിയ കാര്‍ത്ത്യായനിയെ ചുറ്റികകൊണ്ട് അടിച്ചുവീഴ്ത്തുകയായിരുന്നു. വൈകിട്ട് കാര്‍ത്ത്യായനിയുടെ മകന്‍ വീട്ടില്‍ എത്തിയപ്പോഴാണ് അമ്മ രക്തത്തില്‍ കുളിച്ച് കിടക്കുന്നത് കണ്ടത്. തളിപ്പറമ്പ് ഇന്‍സ്‌പെക്ടര്‍ എ.വി. ദിനേശന്‍, എസ്‌ഐ പി.സി. സഞ്ജയ് കുമാര്‍ എന്നിവരുടെ നേതൃത്വത്തില്‍ നടത്തിയ അന്വേഷണത്തിനൊടുവില്‍ പ്രതിയെ പിടികൂടുകയായിരുന്നു. പ്രതിയെ പൊലീസ് ചോദ്യം ചെയ്തു വരികയാണ്.