കേഴമാനിനെ കൊന്ന് കറിവെച്ച സംഭവം: മൂന്നുപേര്‍ കൂടി അറസ്റ്റില്‍

തിരുവനന്തപുരം: പാലോട് കേഴമാനിനെ കറിവച്ച കേസില്‍ മൂന്ന് പേര്‍ കൂടി അറസ്റ്റില്‍. വെമ്പായം സ്വദേശിയും താല്‍ക്കാലിക ഫയര്‍ വാച്ചറുമായ അന്‍ഷാദ്, പാലോട് പച്ച കക്കോട്ടുകുന്ന് സ്വദേശിയായ രാജേന്ദ്രന്‍, ബന്ധു സതീശന്‍ എന്നിവരാണ് പിടിയിലായത്. മെയ് 10നാണ് സംഭവം. പച്ചമല സെക്ഷനില്‍ നാട്ടുകാര്‍ ശ്രദ്ധയില്‍പ്പെടുത്തിയ കാലിന് മുറിവേറ്റ കേഴമാനിനെ കൊന്ന് കറിവച്ചുവെന്നാണ് കേസ്. ബീറ്റ് ഫോറസ്റ്റ് ഓഫീസര്‍ ഷജീദ് , ബീറ്റ് സെക്ഷന്‍ ഓഫീസര്‍ അരുണ്‍ ലാല്‍ എന്നിവരെ സസ്‌പെന്‍ഡ് ചെയ്തിരുന്നു. കരാര്‍ തൊഴിലാളി സനല്‍ രാജിനെ പുറത്താക്കി. അന്‍ഷാദും താല്‍കാലിക വാച്ചറായ സനല്‍ രാജ്, ബീറ്റ് ഫോറസ്റ്റ് ഓഫീസറായ ഷജീദും ചേര്‍ന്ന് രാജേന്ദ്രന്റെ വീട്ടില്‍വച്ച് മാനിനെ കറിവച്ച് കഴിച്ചുവെന്നാണ് കണ്ടെത്തല്‍. രാജേന്ദ്രന്റെ ബന്ധുവായ സതീശനും ഒപ്പം കൂടി. അന്‍ഷാദിനെ ഗള്‍ഫില്‍ നിന്നും നാട്ടിലേക്ക് തിരിച്ചു വിളിച്ച് വിമാനത്താവളത്തില്‍വച്ചാണ് അറസ്റ്റ് ചെയ്തത്. രാജേന്ദ്രന്റെ വീട്ടില്‍ നിന്ന് കേഴമാനിന്റെ തോലും അവശിഷ്ടവും കണ്ടെത്തി. നെടുമങ്ങാട് വനം കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.