സ്‌കൂള്‍ കുട്ടികളില്‍ വിട്ടുമാറാതെ വൈറല്‍ പനി; എച്ച്.വണ്‍ എന്‍.വണ്‍ കേസുകളും കുറവല്ല

സ്‌കൂള്‍ തുറന്നശേഷം കുട്ടികളില്‍ വിട്ടൊഴിയാതെ വൈറല്‍ പനി. തുമ്മല്‍, മൂക്കൊലിപ്പ്, മൂക്കടപ്പ്, തലവേദന, തൊണ്ടവേദന, ചുമ എന്നിവയും ഒപ്പമുണ്ട്. കോവിഡിനു പുറമേ എച്ച്.വണ്‍ എന്‍.വണ്‍ കേസുകളും നിലവിലുണ്ട്. രോഗം ഭേദമായി സ്‌കൂളില്‍ പോയിത്തുടങ്ങുമ്പോഴേക്കും വീണ്ടും പിടികൂടുകയാണ് അടുത്തത്. ആശുപത്രികളിലും ശിശുരോഗവിദഗ്ധരുടെ അടുത്തും പനി ബാധിച്ച കുട്ടികളെയും കൊണ്ടുവരുന്നവരുടെ തിരക്കാണ്. കഴിഞ്ഞ രണ്ടു വര്‍ഷം കുട്ടികള്‍ക്ക് പനിയും ജലദോഷവും ചുമയും കുറവായിരുന്നു. വീട്ടിലിരിപ്പ് കഴിഞ്ഞ് സ്‌കൂളിലെത്തിയപ്പോഴേക്കും സ്ഥിതി മാറി. മിക്ക കുട്ടികളും രോഗത്തിന്റെ അവശതയിലാണ്. പനി മാറിയാലും ഒരു മാസം വരെ വിട്ടുമാറാത്ത ചുമ വലയ്ക്കും. 'സ്‌കൂള്‍ തുറക്കുമ്പോള്‍ മഴയും തണുപ്പും വൈറല്‍ രോഗങ്ങളും പതിവാണ്. രണ്ടു കൊല്ലമായി സ്‌കൂള്‍ ഇല്ലാത്തതിനാല്‍ ഇത്തരം രോഗങ്ങള്‍ വന്ന് സ്വാഭാവിക പ്രതിരോധശേഷി ആര്‍ജിക്കാനുള്ള സാഹചര്യം ഉണ്ടായില്ല. അതാണ് വൈറല്‍ പനി പടരാന്‍ കാരണം. ഇതില്‍ ആശങ്കപ്പെടേണ്ട കാര്യമില്ല-' ശിശുരോഗ വിദഗ്ധര്‍ പറയുന്നു. വിട്ടുമാറാതെ ചുമ സ്‌കൂളില്‍ പോയിത്തുടങ്ങിയതു മുതല്‍ ഇടയ്ക്കിടെ പനി വരും. അന്ന് തുടങ്ങിയ ചുമ ഇതുവരെ വിട്ടുമാറിയിട്ടില്ല. സ്‌കൂളിലെ മറ്റു കുട്ടികളുടെ അവസ്ഥയും ഇതുതന്നെയാണ്. -കെ.എ. നിഷാദ് (രക്ഷിതാവ്, കാക്കശ്ശേരി വീട്, ചേര്‍പ്പ്) വേണ്ടത് ശ്രദ്ധ നല്ല പനിയും ചുമയും ഉള്ളപ്പോള്‍ സ്‌കൂളില്‍ പോകുന്നത് ഒഴിവാക്കണം. പനി വരുമെന്ന് ഭയന്ന് സ്‌കൂളില്‍ വിടാതിരിക്കയുമരുത്. മാസ്‌ക് നിര്‍ബന്ധമാക്കണം. സ്‌കൂളുകള്‍ ഇക്കാര്യത്തില്‍ അലംഭാവം കാണിക്കരുത്. കോവിഡ് പഴയ സ്ഥിതിയില്‍ത്തന്നെയാണെന്ന ഓര്‍മ വേണം. കോവിഡ് മാത്രമല്ല, മറ്റ് രോഗങ്ങള്‍ തടയാനും ഇത് സഹായകമാണ്. രണ്ടു മാസത്തിനുശേഷം തണുപ്പ് മാറുന്നതോടെ വൈറല്‍ പനി കുറയാനാണ് സാധ്യത. -ടി.എം. ആനന്ദകേശവന്‍ (പ്രൊഫസര്‍, ശിശുരോഗവിഭാഗം, മെഡിക്കല്‍ കോളേജ് ആശുപത്രി) പ്രതിരോധശേഷിയിലും മാറ്റം ജീവിതശൈലിയില്‍ വലിയ മാറ്റം വന്നിട്ടുണ്ട്. ടി.വി.യിലും മൊബൈലിലും മുഴുകിയിരുന്ന കുട്ടികള്‍ ക്ലാസില്‍ എത്തിയശേഷം പല തരത്തിലുള്ള വൈറല്‍ രോഗങ്ങളെ അഭിമുഖീകരിക്കുകയാണ്. പ്രതിരോധശേഷിയിലും വ്യത്യാസം വന്നിട്ടുണ്ട്. വൈറല്‍ പനി ഉള്ളപ്പോള്‍ പ്രതിരോധശേഷി കുറയുന്നതിനാല്‍ മറ്റ് രോഗങ്ങളും വരാന്‍ സാധ്യതയുണ്ട്. വന്ന രോഗം തുടര്‍ന്നും വരാം. മാരകമായ അവസ്ഥ ഇല്ല. വ്യായാമം, പോഷകാഹാരം തുടങ്ങിയവ ശ്രദ്ധിക്കണം. ഡോ. പവന്‍ മധുസൂദനന്‍ (ശിശുരോഗവിദഗ്ധന്‍, ജില്ലാ ജനറല്‍ ആശുപത്രി)