മദ്യലഹരിയില്‍ അപകടം, ആംബുലന്‍സില്‍ ആശുപത്രിയിലേക്ക്, പരിചരിച്ച ജീവനക്കാരിയെ മര്‍ദ്ദിച്ച് രോഗി രക്ഷപ്പെട്ടു

തിരുവനന്തപുരം: മദ്യപിച്ച് വാഹനാപകടത്തില്‍ പരിക്ക് പറ്റിയ രോഗിയെ ആശുപത്രിയിലേക്ക് കൊണ്ട് പോയ കനിവ് 108 ആംബുലന്‍സ് വനിതാ ജീവനക്കാരിക്ക് നേരെ രോഗിയുടെ ആക്രമണം. ചൊവ്വാഴ്ച ഉച്ചയ്ക്ക് 2.45നാണ് വെഞ്ഞാറമൂട് വേളാവൂരിന് സമീപം വാഹനാപകടത്തില്‍ ഒരാള്‍ക്ക് പരിക്ക് പറ്റിയതായുള്ള സന്ദേശം കനിവ് 108 ആംബുലന്‍സ് കണ്‍ട്രോള്‍ റൂമില്‍ ലഭിക്കുന്നത്. തുടര്‍ന്ന് കന്യാകുളങ്ങര സര്‍ക്കാര്‍ ആശുപത്രി കേന്ദ്രീകരിച്ചു സര്‍വീസ് നടത്തുന്ന കനിവ് 108 ആംബുലന്‍സ് സംഭവ സ്ഥലത്തെത്തി. എമര്‍ജന്‍സി മെഡിക്കല്‍ ടെക്നീഷ്യന്‍ അമലാദേവി നടത്തിയ പരിശോധനയില്‍ അപകടത്തില്‍പെട്ട വ്യക്തി മദ്യപിച്ചിട്ടുള്ളതായും ഇയാള്‍ക്ക് പരിക്ക് ഉള്ളതായും മനസിലാക്കി ഉടന്‍ തന്നെ മെഡിക്കല്‍ കോളേജിലേക്ക് കൊണ്ട് പോവുകയായിരുന്നു. എന്നാല്‍ ഇദ്ദേഹം ആംബുലന്‍സിനുള്ളില്‍ വെച്ച് അക്രമാസക്തനാകുകയും ഇയാള്‍ക്ക് പ്രഥമ ശുശ്രൂഷ നല്‍കുകയുമായിരുന്നു എമര്‍ജന്‍സി മെഡിക്കല്‍ ടെക്നീഷ്യന്‍ അമലാദേവിയെ മര്‍ദ്ദിക്കുകയുമായിരുന്നു. മെഡിക്കല്‍ കോളേജ് ആശുപത്രിയില്‍ എത്തിച്ച രോഗി ആംബുലന്‍സിന്റെ സ്ട്രെച്ചര്‍ തകര്‍ക്കുകയും ചെയ്തു. ഇയാളെ പിടികൂടാന്‍ ശ്രമിച്ചെങ്കിലും ഓടി രക്ഷപ്പെടുകയായിരുന്നു എന്നാണ് ഇവര്‍ മെഡിക്കല്‍ കോളേജ് പൊലീസ് സ്റ്റേഷനില്‍ നല്‍കിയ പരാതിയില്‍ പറയുന്നത്.