‘അവധിയെടുത്ത് വിദേശത്ത് ജോലി ചെയ്യേണ്ട’; ശൂന്യവേതനാവധി 5 വര്‍ഷമാക്കി വിജ്ഞാപനം

തിരുവനന്തപുരം: സര്‍ക്കാര്‍ ജീവനക്കാര്‍ക്ക് സേവന കാലയളവില്‍ എടുക്കാന്‍ കഴിയുന്ന ശൂന്യവേതന അവധിയുടെ കാലാവധി 20 വര്‍ഷത്തില്‍നിന്ന് 5 വര്‍ഷമാക്കി ചുരുക്കി ചട്ടങ്ങള്‍ ഭേദഗതി ചെയ്തു. ഇതു സംബന്ധിച്ച ഉത്തരവ് 2020ല്‍ ഇറങ്ങിയെങ്കിലും ഇപ്പോഴാണ് വിജ്ഞാപനം പുറത്തിറങ്ങിയത്. ചട്ടങ്ങള്‍ ഭേദഗതി ചെയ്തതോടെ, ശൂന്യവേതന അവധിയെടുത്ത് അഞ്ചു വര്‍ഷത്തിനുശേഷം സര്‍വീസില്‍ പ്രവേശിക്കാത്ത ജീവനക്കാര്‍ക്കെതിരെ സര്‍ക്കാരിനു നടപടിയെടുക്കാനാകും. സര്‍വീസില്‍ പ്രവേശിച്ചശേഷം ശൂന്യവേതന അവധിയെടുത്ത് വര്‍ഷങ്ങളോളം വിദേശത്തു ജോലി ചെയ്യുന്ന നിരവധി ഉദ്യോഗസ്ഥരുണ്ടെന്നു സര്‍ക്കാര്‍ പരിശോധനയില്‍ കണ്ടെത്തിയിരുന്നു. കോവിഡ് സമയത്താണ് ആരോഗ്യവകുപ്പ് ഉള്‍പ്പെടെയുള്ള പ്രധാന വകുപ്പുകളില്‍നിന്നും ശൂന്യവേതന അവധിയെടുത്ത് പോയവരുടെ കണക്കെടുത്തത്. ആരോഗ്യവകുപ്പില്‍നിന്നും ശൂന്യവേതന അവധിയെടുത്ത് പോയ ഡോക്ടര്‍മാരോട് സര്‍വീസില്‍ തിരികെയെത്താന്‍ കോവിഡ് കാലത്ത് സര്‍ക്കാര്‍ നിര്‍ദേശിച്ചിരുന്നു. ചിലര്‍ മാത്രമാണ് മടങ്ങിയെത്തിയത്. തിരിച്ചെത്താത്ത ഡോക്ടര്‍മാരെ പിരിച്ചുവിട്ടു. ഇതിനു പിന്നാലെ ശൂന്യവേതന അവധിയുടെ കാലാവധി 20 വര്‍ഷത്തില്‍നിന്ന് 5 വര്‍ഷമാക്കി ചുരുക്കി. സര്‍വീസില്‍ കയറിയ ഉടനെ തന്നെ ശൂന്യവേതന അവധിയില്‍ പ്രവേശിക്കുന്നവരുണ്ട്. പഠനാവശ്യവും മറ്റു ആവശ്യങ്ങളും ചൂണ്ടിക്കാട്ടിയാണ് അവധി അപേക്ഷിക്കുന്നത്. തുടര്‍ച്ചയായി 5 വര്‍ഷം അവധിയെടുക്കാം. പിന്നീട് സര്‍വീസില്‍ തിരികെ പ്രവേശിച്ച് ദിവസങ്ങള്‍ക്കുശേഷം വീണ്ടും ശൂന്യവേതന അവധിയില്‍ പ്രവേശിക്കും. ശൂന്യവേതന അവധിയായതിനാല്‍ ശമ്പളവും ആനുകൂല്യങ്ങളും ആ കാലയളവില്‍ നല്‍കേണ്ടെങ്കിലും പിന്നീട് ജോലി ചെയ്യുന്ന കാലയളവിലെ ശമ്പളവും പെന്‍ഷനും സര്‍ക്കാരിനു നല്‍കേണ്ടി വരും. ഒരു ജീവനക്കാരന്‍ ശൂന്യവേതന അവധിയില്‍ പോകുമ്പോള്‍ മറ്റൊരാളെ നിയമിക്കണം. അയാളുടെ ശമ്പളവും പെന്‍ഷനും സര്‍ക്കാരിനു നല്‍കണം. പുതിയ തീരുമാനത്തിലൂടെ ഇത്തരം ബാധ്യതകള്‍ സര്‍ക്കാരിനു കുറയ്ക്കാനാകും.