‘പാതാളഭരണി വരണ്ടിയുണ്ടോ സഖാവേ, നാവു തപ്പിയെടുക്കാൻ… ?’

ലോ കോളേജ് വിദ്യാര്‍ത്ഥികള്‍ ലക്ഷ്മി നായര്‍ക്കെതിരെ നടത്തുന്ന സമരം മൂന്നാം വാരത്തിലേക്ക് പ്രവേശിച്ചിട്ടും എന്തുകൊണ്ടാണ് ഇക്കാര്യത്തില്‍ എം സ്വരാജ് മാത്രം പ്രതികരിക്കാതിരിക്കുന്നതെന്ന് അഡ്വ: ജയശങ്കര്. സമരത്തിന്റെ മുന്‍‌പന്തിയില്‍ എസ് എഫ് ഐ ആണുള്ളത്. വി.എസ്.അച്യുതാനന്ദന്‍, വി.എം.സുധീരന്‍, കാനം രാജേന്ദ്രന്‍ എന്നിവരെല്ലാം വന്നുപോയിക്കഴിഞ്ഞിട്ടും സ്വരാജ് ഒരാശംസ സന്ദേശം പോലും അയച്ചിട്ടില്ലെന്നും ജയശങ്കര്‍ തന്റെ ഫേസ്‌ബുക്ക് പോസ്റ്റിലൂടെ പറയുന്നു. അഡ്വ: ജയശങ്കറിന്റെ ഫേസ്‌ബുക്ക് പോസ്റ്റിന്റെ പൂര്‍ണരൂപം: പാതാളഭരണിവരണ്ടിയുണ്ടോ സഖാവേ, നാവു തപ്പിയെടുക്കാൻ ? ലാ അക്കാദമി ലാ കാളേജ് വിദ്യാർത്ഥികളുടെ ലക്ഷ്മി നായർ വിരുദ്ധ സമരം ജനത്തിരക്കേറിയ മൂന്നാം വാരത്തിൽ പ്രവേശിച്ചിട്ടും സമരത്തിന്റെ മുൻപന്തിയിൽ എസ്.എഫ്.ഐ. ഉണ്ടായിട്ടും സഖാവ് സ്വരാജ് നായർ എന്തുകൊണ്ട് പ്രതികരിക്കുന്നില്ല എന്ന് പാർട്ടിക്കാർ തന്നെ ചോദിക്കാൻ തുടണ്ടിയിരിക്കുന്നു. എസ്.എഫ്.ഐ.യുടെ മുൻ സംസ്ഥാനസെക്രട്ടറി, ഡിഫിയുടെ സെക്രട്ടറി, തൃപ്പൂണിത്തുറ എം.എൽ.എ., വിപ്ലവ തീപ്പന്തം എന്നീ നിലകളിലൊക്കെ സമരപ്പന്തൽ സന്ദർശിച്ചു വിദ്യാർത്ഥികളോട് ഐക്യദാർഢ്യം പ്രകടിപ്പിക്കാൻ നായരുകുട്ടിക്ക് ബാധ്യതയുണ്ട്. മാത്രമല്ല വി.എസ്.അച്യുതാനന്ദൻ, വി.എം.സുധീരൻ, കാനം രാജേന്ദ്രൻ എന്നിവരൊക്കെ വന്നുപോയിക്കഴിഞ്ഞു. ബി.ജെ.പി.നേതാവ് മുരളീധരൻ പന്തലിൽ ഉപവാസം വരെ നടത്തിക്കളഞ്ഞു. എന്നാൽ ഫേസ്ബുക്ക് വഴിയെങ്കിലും ഒരാശംസാസന്ദേശം അയക്കാൻ സ്വരാജിന് സാധിച്ചില്ല. വി.എസ്.അച്യുതാനന്ദനും വി.എം.സുധീരനും വി.മുരളീധരനും കാനം രാജേന്ദ്രനും ഇല്ലാത്ത ഒരു പരാധീനത സ്വരാജിനുണ്ട്. അദ്ദേഹം പിൻവാതിലിലൂടെ ലാ അക്കാദമിയിൽ പ്രവേശനം നേടി, 'നല്ല' മാർക്കോടെ ബിരുദം നേടിയ ആളാണ്. എന്തിന് സ്വരാജിനെ പറയണം? ലാ അക്കാദമിക്കെതിരെ സുരേഷ്കുറുപ്പ്‌പോലും പ്രതികരിക്കില്ല. കാരണം അദ്ദേഹവും അക്കാദമി പ്രോഡക്ട് ആണ്. പാർട്ടിഭേദമന്യേ യുവതലമുറയിലെ ഒട്ടുമിക്ക നേതാക്കളും ലാ അക്കാദമി ഉൽപ്പന്നങ്ങളാണ്. തിരുവനന്തപുരത്തും എറണാകുളത്തും കോഴിക്കോട്ടും (പിന്നെ തൃശ്ശൂരും) മാത്രം സർക്കാർ ലോ കോളേജുകൾ ഉണ്ടായിരുന്നകാലത്തു നിരങ്ങിപാസ്സുകാരായ നേതാക്കന്മാർക്ക് ലാ അക്കാദമിയിലല്ലാതെ ഒരിടത്തും അഡ്മിഷൻ കിട്ടുമായിരുന്നില്ല. അക്കാദമിക്ക് പിൻവാതിൽ അല്ലാതെ മുൻവാതിൽ ഉണ്ടായിരുന്നേയില്ല. ത്രിവത്സര എൽഎൽ.ബി പ്രവേശനത്തിന് രാഷ്ട്രീയ സ്വാധീനം മാത്രമായിരുന്നു യോഗ്യത. കോൺഗ്രസിന്, കമ്മ്യൂണിസ്റ്റിനു, ലീഗിന്, ബി.ജെ.പി.ക്ക്- എല്ലാവർക്കും യഥാശക്തി സീറ്റുകൾ വീതിച്ചുകൊടുക്കുകയായിരുന്നു. ഇ.എം.എസ്. നമ്പൂതിരിപ്പാടും, സി.അച്യുതമേനോനും മുതൽ കൊടുത്ത ശുപാർശകത്തുകൾ ഡോ.നാരായണൻ നായർ ഫയലാക്കി സൂക്ഷിച്ചിട്ടുണ്ട്. അക്കാദമിക്കെതിരെ പ്രതികരിക്കുന്നത് ഏത് പൊന്നുമോനായാലും സൂക്ഷിക്കണം. അല്ലെങ്കിൽ ശുപാർശ കത്ത് പുറത്തുവരും. ഒരാൾക്ക് അഡ്മിഷൻ നൽകാൻ ഒന്നിലധികം നേതാക്കളിൽ നിന്നും ശുപാർശ കത്ത് വാങ്ങലും പതിവാണ്. ഉദാഹരണത്തിന്, വെളിയം ഭാർഗവാന്റെ കത്തുമായി ചെന്നാൽ അതുവാങ്ങിവെച് ഇനി പി.എസ്.ശ്രീനിവാസന്റെ ഒരു കത്തുകൂടി കൊണ്ടുവന്നാൽ നോക്കാം എന്നുപറയും നാരായണൻ നായർ. അങ്ങനെ ലാ അക്കാദമി വഴി നിയമബിരുദം നേടിയ പലരും അത്യുന്നതസ്ഥാനങ്ങളിൽ എത്തിയിട്ടുണ്ട്. സുപ്രീം കോടതി ജഡ്ജി കുര്യൻ ജോസഫ് കേരളാ കോൺഗ്രസ് ക്വാട്ടയിൽ കയറിയ ആളാണ്. കെ.എം.ജോർജ് ആണോ കെ.എം. മാണിയാണോ അതോ രണ്ടുപേരുംകൂടിയാണോ ശുപാർശ ചെയ്തതെന്നറിയില്ല. ഈ രാഷ്ട്രീയ സ്വാധീനം കൊണ്ടാണ്, പൊതുസ്ഥാപനമായി ആരംഭിച്ച ലാ അക്കാദമി സ്വകാര്യ സ്വത്താക്കി മാറ്റാൻ നാരായണൻ നായർക്ക് സാധിച്ചത്. പാട്ടത്തിനു കിട്ടിയ സ്ഥലം പിന്നീട് പതിപ്പിച്ചെടുക്കാൻ സാധിച്ചതും ഈ രാജ്യത്തെ ഭരണഘടനയും പാർലമെന്റും നിയമസഭയും പാസാക്കിയ നിയമങ്ങളും അക്കാദമിക്ക് ബാധകമല്ലാതായതും അതുകൊണ്ടുതന്നെ. ഇടതുപക്ഷം ഭരിച്ചാലും വലതുപക്ഷം ഭരിച്ചാലും അദ്ദേഹത്തിന് പേടിക്കണ്ട. ഇനി ബി.ജെ.പി.വന്നാലും കുഴപ്പമില്ല. വല്ല മാവോയിസ്റ്റുകളോ മറ്റോ അധികാരം പിടിച്ചെടുക്കാൻ സാധ്യതയുണ്ടായാൽ അവർക്കും പിൻവാതിലിലൂടെ പ്രവേശനം നൽകാൻ മടിക്കില്ല. ഈ യാഥാർഥ്യം തിരിച്ചറിഞ്ഞു വിദ്യാർത്ഥികൾ സമരം എത്രയും വേഗം പിൻവലിച്ചു ലക്ഷ്മി മാഡത്തിനോട് മാപ്പുപറയുന്നതാണ് അവർക്ക് നല്ലത്. സമരക്കാരെ സഹായിക്കാൻ വിദ്യാഭ്യാസമന്ത്രിയും വരില്ല മുഖ്യമന്ത്രിയും വരില്ല. പ്രതിപക്ഷ നേതാവിനെയും പ്രതീക്ഷിക്കണ്ട. ലാ അക്കാദമി സ്ഥലം പിശകാണ്. സൂക്ഷിക്കണം അല്ലെങ്കിൽ തടി കേടാവും.