പീഡനക്കേസ് ഒതുക്കാന്‍ ഒരു കോടിയോളം രൂപ കൈക്കൂലി : എറണാകുളം നോര്‍ത്ത് സി.ഐയ്ക്ക് സസ്‌പെന്‍ഷന്‍

നഗരമധ്യത്തില്‍ യുവതിയെ ഒരുമാസത്തോളം മുറിയില്‍ പൂട്ടിയിട്ട് ബലാല്‍സംഗം ചെയ്ത സംഭവത്തില്‍ കേസ് ഒതുക്കിത്തീര്‍ക്കാന്‍ ഒരു കോടിയോളം രൂപ കൈക്കൂലി വാങ്ങിയ സിഐയ്ക്ക് സസ്‌പെന്‍ഷന്‍. എറണാകുളം നോര്‍ത്ത് സി.ഐ: ടി.ബി. വിജയനെയാണ് സസ്‌പെന്റു ചെയ്തത്‌

ഇരുപത്തഞ്ചോളം പേര്‍ പ്രതികളായ സംഭവം പോലീസും അഭിഭാഷകനും ഒരുകോടിയോളം രൂപ വാങ്ങി ഒതുക്കിയെന്ന് സംസ്ഥാന രഹസ്യാന്വേഷണ വിഭാഗം (എസ്.എസ്.ബി) ആഭ്യന്തരവകുപ്പിനു റിപ്പോര്‍ട്ട് നല്‍കുകയായിരുന്നു.

ഒരുമാസം മുന്‍പാണ് സംഭവം. മൂവാറ്റുപുഴ സ്വദേശിനിയായ യുവതിയാണ് തുടര്‍ച്ചയായി പീഡിപ്പിക്കപ്പെട്ടത്. പൂട്ടിയിട്ടിടത്തു നിന്ന് രക്ഷപ്പെട്ട യുവതി പാലാരിവട്ടം പോലീസില്‍ പരാതി നല്‍കുകയും ഇരുപത്തഞ്ചോളം പേര്‍ തന്നെ ഉപദ്രവിച്ചെന്ന് ആദ്യം മൊഴി നല്‍കുകയും ചെയ്തിരുന്നു. എന്നാല്‍ അഭിഭാഷകന്‍ ഉള്‍പ്പെട്ട ഏജന്റുമാരുടെ സഹായത്തോടെ പോലീസ് പണം വാങ്ങി കേസ് മുക്കി. പ്രതികളില്‍നിന്ന് ഏഴുലക്ഷം രൂപവരെ വാങ്ങിയതായിട്ടാണ് വിവരം. കിട്ടിയപണത്തില്‍ അഞ്ചുലക്ഷം വീതം യുവതിക്കു നല്‍കി. സി.ഐയുടെ നേതൃത്വത്തിലുള്ള പോലീസ് സംഘത്തിന് രണ്ടുലക്ഷം രൂപ വീതവും നല്‍കി. ഒരുകോടിയോളം രൂപയാണ് ഈ ഒറ്റ കേസ് മുക്കിയതിലൂടെ മറിഞ്ഞതെന്നാണ് ആക്ഷേപം.

മൂവാറ്റുപുഴ സ്വദേശിനിയായ യുവതിയെ ഇവന്റ് മാനേജ്‌മെന്റ് കമ്പനിയില്‍ ജോലി നല്‍കാമെന്നു പറഞ്ഞാണത്രേ കൊച്ചിയില്‍ കൊണ്ടുവന്നത്. ആദ്യം സ്ഥാപന ഉടമ തന്നെ പീഡിപ്പിച്ചു. തുടര്‍ന്നു വീട് വാടകയ്‌ക്കെടുത്ത് യുവതിയെ അവിടെ പൂട്ടിയിട്ട് പലര്‍ക്കും കാഴ്ചവച്ചു. ഇവിടെനിന്നു രക്ഷപ്പെട്ട യുവതി പോലീസില്‍ പരാതി നല്‍കുകയായിരുന്നു. എന്നാല്‍ പണം വാങ്ങി കേസ് മുക്കിയതറിഞ്ഞ സ്‌പെഷല്‍ ബ്രാഞ്ച് കര്‍ശന നടപടി ആവശ്യപ്പെട്ട് സര്‍ക്കാരിന് റിപ്പോര്‍ട്ട് നല്‍കുകയായിരുന്നു.