നടിയെ ആക്രമിച്ച കേസില്‍ പള്‍സര്‍ സുനിയുടെ അഭിഭാഷകന്റെ ഓഫീസില്‍ പോലീസ് റെയ്ഡ്

നടിയെ ആക്രമിച്ച കേസില്‍ മുഖ്യപ്രതി പള്‍സര്‍ സുനിയുടെ അഭിഭാഷകന്‍ പ്രതീഷ് ചാക്കോയുടെ ഓഫീസിലും വീട്ടിലൂം പോലീസ് റെയ്ഡ്. നടിയുടെ ചിത്രം പകര്‍ത്തിയ മൊബൈല്‍ ഫോണ്‍ കണ്ടെത്തുന്നതിനാണ് റെയ്ഡ്. കഴിഞ്ഞ ദിവസം അഭിഭാഷകനെ ചോദ്യം ചെയ്തുവെങ്കിലും മൊബൈല്‍ ഫോണ്‍, സിം കാര്‍ഡ്, മെമ്മറി കാര്‍ഡ് എന്നിവയെ കുറിച്ച് വ്യക്തമായ സൂചന നല്‍കാന്‍ തയ്യാറായിരുന്നില്ല. ഇതേതുടര്‍ന്നാണ് പോലീസ് പരിശോധന നടത്തിയത്.

പള്‍സര്‍ സുനിയെ ചോദ്യം ചെയ്തുവെങ്കിലും മൊബൈല്‍ ഫോണ്‍ എവിടെയാണെന്നത് സംബന്ധിച്ച് പരസ്പര വിരുദ്ധമായ മൊഴികളാണ് നല്‍കിയിരുന്നത്. മൊബൈല്‍ ഉപേക്ഷിച്ചുവെന്ന് പറഞ്ഞ അഴുക്കുചാലുകളിലും കൊച്ചി കായലിലും തിരച്ചില്‍ നടത്തിയെങ്കിലും കണ്ടെത്താന്‍ കഴിഞ്ഞിരുന്നില്ല. സുനി ഒളിവില്‍ പോകുന്നതിന് മുന്‍പ് അഭിഭാഷകനെ കണ്ടപ്പോള്‍ കൈകാറിയ രേഖകള്‍ക്കൊപ്പം മൊബൈല്‍ ഫോണും ഉണ്ടെന്ന നിഗമനത്തിലാണ് പോലീസ്.