കൃഷ്ണദാസിനെ പൊക്കിയ പൊലീസിനോട് ജഡ്ജി കലിച്ചതിന് കാരണം ഇതോ…?

നെഹ്‌റു ഗ്രൂപ്പ് ചെയര്‍മാന്‍ കൃഷ്ണദാസിന്റെ അറസ്റ്റില്‍ പോലീസിനെതിരെ രൂക്ഷ വിമര്‍ശനം ഉന്നയിച്ച ഹൈക്കോടതി ജഡ്ജ് ഏബ്രഹാം മാത്യു പ്രതിയുമായി വ്യക്തി ബന്ധം പുലര്‍ത്തുന്നയാളെന്ന് ആരോപണം. നെഹ്‌റു ഗ്രൂപ്പിന് കീഴിലുള്ള ലക്കിടി ലോ കോളജില്‍ കഴിഞ്ഞ വര്‍ഷം സംഘടിപ്പിച്ച പഠനയാത്രയില്‍ മുഖ്യാതിഥിയായി പങ്കെടുത്തത് ജസ്റ്റിസ് ഏബ്രഹാം മാത്യുവായിരുന്നു. പഠനയാത്രയ്ക്കിടെ ജസ്റ്റിസ് ഏബ്രഹാം മാത്യു കോളജ് അധികൃര്‍ക്കൊപ്പം എടുത്ത ചിത്രം പുറത്ത് വന്നു.

ബാര്‍ കൗണ്‍സില്‍ ഓഫ് ഇന്ത്യയാണ് യാത്ര സംഘടിപ്പിച്ചത്. ഏബ്രഹാം മാത്യുവിനൊപ്പം ലക്കിടി കോളജിലെ പ്രിന്‍സിപ്പല്‍ സെബാസ്റ്റിയന്‍, കേസില്‍ പ്രതിയായി അറസ്റ്റ് ചെയ്യപ്പെട്ട നിയമോപദേശക സുചിത്ര എന്നിവര്‍ നില്‍ക്കുന്ന ചിത്രമാണ് പുറത്ത് വന്നത്. കേസിലെ പരാതിക്കാരനായ ഷഹീര്‍ ഷൗക്കത്തും ചിത്രത്തിലുണ്ട്. ഇതേ ഏബ്രഹാം മാത്യു തന്നെയാണ് കൃഷ്ണദാസിന്റെ മുന്‍കൂര്‍ ജാമ്യാപേക്ഷ പരിഗണിക്കവെ പോലീസിനെതിരെ രൂക്ഷവിമര്‍ശനം ഉന്നയിച്ചത്. സംഭവത്തില്‍ ജിഷ്ണു പ്രണോയിയുടെ അമ്മ ഹൈക്കോടതി ചീഫ് ജസ്റ്റിസിന് പരാതി നല്‍കി.