ജിഷ്ണുവിന്റെ മരണത്തില്‍ ഉത്തരവാദികളായവരെ അറസ്റ്റ് ചെയ്യണമെന്ന ആവശ്യവുമായി കുടുംബം തലസ്ഥാനത്ത്

ജിഷ്ണു പ്രണോയിയുടെ മരണത്തില്‍ ഉത്തരവാദികളായവരെ അറസ്റ്റ് ചെയ്യണമെന്ന ആവശ്യവുമായി കുടുംബം തലസ്ഥാനത്ത്. ഡിജിപി ഓഫീസിന് മുന്നില്‍ സമരം ചെയ്യുവാനാണ് ഉദ്ദേശിക്കുന്നത്. അമ്മയും അച്ഛനും പിന്നെ ജിഷ്ണുവിന്റെ സുഹൃത്തുക്കളും അടങ്ങുന്ന സംഘമാണ് സമരത്തിനായി എത്തിയിരിക്കുന്നത്. 10 മണിയോടെ സമരം ആരംഭിക്കും. പ്രതികളെ എല്ലാവരേയും അറസ്റ്റ് ചെയ്യുന്നത് വരെ സമരത്തില്‍ നിന്ന് പിന്മാറില്ലെന്നും അമ്മ മഹിജ മാധ്യമങ്ങളോട് പറഞ്ഞു.

തന്റെ മകന്‍ മരിച്ച് ഇത്രയധികം ദിവസമായിട്ടും പോലീസ് ഇതുവരെ ആരെയും അറസ്റ്റ് ചെയ്തിട്ടില്ലെന്നും ഇതില്‍ പ്രതിഷേധിച്ചാണ് സമരത്തിലേക്ക് നീങ്ങിയതെന്നും അച്ഛന്‍ അശോകന്‍ പറഞ്ഞു. കൃഷ്ണദാസിനെ അറസ്റ്റ് ചെയ്തത് നാടകമാണെന്നും ഇത്രകാലമായിട്ടും മറ്റ് പ്രതികളെ എന്തുകൊണ്ട്‌ അറസ്റ്റ് ചെയ്തില്ലെന്നും അദ്ദേഹം ചൂണ്ടിക്കാണിച്ചു.