സെന്‍കുമാറിന് അനുകൂല വിധി സര്‍ക്കാരിനെതിരായ കുറ്റപത്രം : ചെന്നിത്തല

സര്‍ക്കാരിനെതിരായ കുറ്റപത്രമാണ് ടി.പി സെന്‍കുമാറിന് അനുകൂലമായ സുപ്രീംകോടതി വിധിയെന്ന് പ്രതിപക്ഷ നേതാവ് രമേശ് ചെന്നിത്തല. ഇടത് സര്‍ക്കാരിന്റെ ആദ്യ തീരുമാനത്തിന് എതിരെയുള്ള തിരിച്ചടിയാണ് കോടതി വിധി. മുഖ്യമന്ത്രിയ്ക്ക് തത്സ്ഥാനത്ത് ഇരിക്കാന്‍ അവകാശമില്ലെന്നും ചെന്നിത്തല വാര്‍ത്താ സമ്മേളനത്തില്‍ പറഞ്ഞു.

ജിഷ വധക്കേസ്, പുറ്റിങ്ങല്‍ ദുരന്തം എന്നീ സംഭവങ്ങളില്‍ സെന്‍കുമാറിന് പിഴവ് സംഭവിച്ചുവെന്നാണ് സര്‍ക്കാര്‍ കോടതിയില്‍ പറഞ്ഞത്. ഞാന്‍ ആഭ്യന്തര മന്ത്രിയായിരുന്ന സമയത്താണ്ഈ രണ്ട് സംഭവങ്ങളും നടന്നത്. കര്‍മനിരതനായാണ് സെന്‍കുമാര്‍ ഈ രണ്ടു കേസുകളിലും പ്രവര്‍ത്തിച്ചത്. മനുഷ്യ സാധ്യമായതെല്ലാം അദ്ദേഹം ചെയ്തു.

കേരളത്തിലെ സര്‍ക്കാരിന്റെ പിടിപ്പു കേടാണ് കോടതിയില്‍ സെന്‍കുമാറിനെതിരെ നല്‍കിയ സത്യവാങ്മൂലങ്ങള്‍. പൊതുതാത്പര്യമില്ലാത്ത ഒരു ഡിജിപിയാണ് സെന്‍കുമാറെന്നാണ് ഇവര്‍ പറയുന്നത്. അങ്ങനെ പറയുമ്പോള്‍ ഇപ്പോള്‍ ഡിജിപിയെ പത്ത് തവണ മാറ്റണ്ടി വരുമെന്നും ചെന്നിത്തല പറഞ്ഞു.