ജീവനു വിലയില്ല,വിഐപിയ്ക്കു സുഖയാത്ര

ബാംഗ്ലൂരില്‍ വീണ്ടും ഗുരുതരാവസ്ഥയിലായ രോഗിയെയും വഹിച്ചു കൊണ്ടുള്ള ആംബുലന്‍സിന്റെ യാത്ര ഗതാഗതക്കുരുക്കില്‍ പെട്ടു.വിഐപി യ്ക്കു കടന്നു പോകാന്‍ അധികൃതര്‍ തയ്യാറാക്കിയ താല്‍ക്കാലിക മാര്‍ഗ്ഗത്തിലാണ് ആംബുലന്‍സ് പെട്ടത്.വിഐപി യാത്രകളില്‍ റോഡുകളില്‍ ഒരുക്കുന്ന സുരക്ഷയിലും ഗതാഗത തടസ്സത്തിലും പെടാതെ ആംബുലന്‍സുകളുടെ യാത്ര സുഗമമാക്കുമെന്നുള്ള മുഖ്യമന്ത്രിയുടെ പ്രസ്താവനയ്ക്കു പിന്നാലെയാണ് ബാംഗ്ലൂരിലെ ക്യൂന്‍സ് റോഡില്‍ അറുപതുകാരനായ ഗുരുതരാവസ്ഥയിലുള്ള ഹൃദയം രോഗിയെയും പേറി വിഐപിയ്ക്കു വേദിയൊരുക്കാനുള്ള കുരുക്കില്‍ പെട്ടത്. എട്ടു മിനിറ്റോളമാണ് ആംബുലന്‍സ് സൈറനും മുഴക്കി കുരുക്കില്‍ കിടന്നത്.അവസാനം ആംബുലന്‍സ് ജീവനക്കാര്‍ ഡോക്ടറെ ഫോണ്‍ ചെയ്ത് വിവരമറിയിച്ചു.ആംബുലന്‍സ് കടത്തിവിടണമെന്ന് ആവശ്യപ്പെട്ടങ്കിലും പറ്റില്ലെന്നായിരുന്നു പൊലീസിന്റെയും മറുപടി.അതീവ ഗുരുതരാവസ്ഥയിലായിരുന്ന രോഗി കുറച്ചു സമയം കൂടി കഴിഞ്ഞിരുന്നെങ്കില്‍ മരണത്തിലേക്കു പോകുമായിരുന്നെന്ന് ഡോക്ടര്‍ പറഞ്ഞു. കര്‍ണാടക ആഭ്യന്തര വകുപ്പ് മന്ത്രി ജി പരമേശ്വരയ്ക്ക് വഴിയൊരുക്കാനാണ് ആംബുലന്‍സ് വഴിയില്‍ പിടിച്ചിട്ടത്.വിഐപി യാത്രയ്ക്ക് ആംബുലന്‍സിനേക്കാള്‍ പരിഗണ നല്‍കിയതിനെതിരെ വിവിധയിടങ്ങളില്‍ നിന്നും ശക്തമായ വിമര്‍ശമാണ് സംസ്ഥാന ഭരണകൂടം നേരിടുന്നത്.