സര്‍ക്കാരിന്റെ ഒന്നാം വാര്‍ഷികാഘോഷത്തിന്‌ വി.എസ്സിനെ ക്ഷണിച്ചില്ല

വി.എസ്‌. അച്യുതാനന്ദനെ പിണറായി സര്‍ക്കാര്‍ ഒന്നാം വാര്‍ഷികാഘോഷച്ചടങ്ങിന്‌ ഔദ്യോഗികമായി ക്ഷണിച്ചില്ല. ക്യാബിനറ്റ്‌ പദവിയുള്ള ഭരണപരിഷ്‌കാര കമ്മിഷന്‍ അധ്യക്ഷനായ അദ്ദേഹത്തിനു നല്‍കിയത്‌ എം.എല്‍.എമാര്‍ക്കു നല്‍കുന്ന പ്രവേശന പാസ്‌ . ഔദ്യോഗിക ക്ഷണം കിട്ടായിരുന്നതോടെ അദ്ദേഹം ചടങ്ങില്‍നിന്നു വിട്ടുനിന്നു. പ്രതിപക്ഷ നേതാവ്‌ രമേശ്‌ ചെന്നിത്തല ഉള്‍പ്പെടെയുള്ള പ്രമുഖരെ പിണറായി സര്‍ക്കാരിന്റെ ആദ്യ വാര്‍ഷികം ആഘോഷിക്കുന്ന ചടങ്ങിലേക്കു ക്ഷണിച്ചിരുന്നു. എന്നാല്‍, മുന്‍ മുഖ്യമന്ത്രിയും ഭരണമുന്നണിക്കു നേതൃത്വം നല്‍കുന്ന സി.പി.എമ്മിന്റെ മുതിര്‍ന്ന നേതാവുമായ വി.എസിന്റെ കാര്യത്തില്‍ അതുണ്ടായില്ല. പരിപാടി നടക്കുന്ന നിശാഗന്ധി ഓഡിറ്റോറിയത്തിലേക്ക്‌ എല്ലാ എം.എല്‍.എമാര്‍ക്കും നല്‍കിയ പ്രവേശന പാസ്‌ മാത്രമാണ്‌ അദ്ദേഹത്തിന്റെ ഓഫീസിലേക്കു നല്‍കിയത്‌. ചടങ്ങില്‍ വി.എസിന്റെ അസാന്നിധ്യം ശ്രദ്ധയില്‍പ്പെട്ട മാധ്യമപ്രവര്‍ത്തകര്‍ അന്വേഷിച്ചപ്പോഴാണ്‌ അദ്ദേഹെത്ത ക്ഷണിച്ചിട്ടില്ലെന്നു വ്യക്‌തമായത്‌. ചടങ്ങില്‍ പങ്കെടുക്കുന്നില്ലെന്ന്‌ അദ്ദേഹത്തിന്റെ ഓഫീസ്‌ സ്‌ഥിരീകരിക്കുകയും ചെയ്‌തു.