അഴിമതിക്കാരനായ തച്ചങ്കരി ഉള്ളിടത്തേക്ക് എങ്ങനെ ചെല്ലുമെന്ന്‌ ജേക്കബ് തോമസ്…?

വീണ്ടും അവധി നീട്ടുന്ന കാര്യം ആലോചിക്കുകയാണെന്ന് ഡിജിപി ജേക്കബ് തോമസ്. താന്‍ വിജിലന്‍സ് ഡയറക്ടറായിരിക്കുന്ന വേളയില്‍ ടോമിന്‍ തച്ചങ്കരിയെ സസ്‌പെന്‍ഡ് ചെയ്യണമെന്ന് സര്‍ക്കാരിനോട് ശിപാര്‍ശ ചെയ്തിരുന്നു. അഴിമതിയില്‍ മുങ്ങി നില്‍ക്കുന്ന തച്ചങ്കരിയെപ്പോലെയുള്ള ഒരു വ്യക്തി പൊലീസ് ആസ്ഥാനത്ത് എഡിജിപി ആയിരിക്കുമ്പോള്‍ എങ്ങനെയാണ് അവിടേക്ക് മടങ്ങിയെത്തുകയെന്നും അദ്ദേഹം ചോദിച്ചതായി ഒരു പ്രമുഖ പത്രം റിപ്പോര്‍ട്ട് ചെയ്തു.

സേനയുടെ തലപ്പത്തെ അസ്വസ്ഥതകളില്‍ തനിക്ക് കടുത്ത ആശങ്കയുണ്ട്. ഇപ്പോള്‍ കാണുന്ന പലതും സേനക്ക് അഭികാമ്യമായതല്ല. അതുകൊണ്ടുതന്നെയാണ് അവധി നീട്ടുന്ന കാര്യം ആലോചിക്കുന്നത്. മൂവാറ്റുപുഴ വിജിലന്‍സ് കോടതിയിലുള്‍പ്പെടെ തച്ചങ്കരിക്കെതിരെ പല കേസുകളുമുണ്ട്. ഇത്തരം കേസുകളുടെ ഗൗരവം കണക്കിലെടുത്താണ് അദ്ദേഹത്തെ സസ്‌പെന്‍ഡ് ചെയ്യണമെന്ന് സര്‍ക്കാരിനോട് ശിപാര്‍ശ ചെയ്തത്. എന്നാല്‍ സര്‍ക്കാര്‍ ഇക്കാര്യം പരിഗണിച്ചില്ല. ഇനി ഒരു തരത്തിലുള്ള വിവാദങ്ങള്‍ക്കൊന്നും താനില്ല. പക്ഷേ അഭികാമ്യമല്ലാത്ത നടപടികളെ അംഗീകരിക്കാന്‍ കഴിയില്ലെന്നും അദ്ദേഹം കൂട്ടിച്ചേര്‍ത്തു.