വിവാഹത്തട്ടിപ്പുകാരിയുടെ കൂട്ടാളിയും പിടിയില്‍

വിവാഹത്തട്ടിപ്പുകാരി ശാലിനിയുടെ കൂട്ടാളിയേയും പോലീസ് അറസ്റ്റ് ചെയ്തു. കോട്ടയം തെള്ളകം കുഴിച്ചാല്‍ കെ.പി. തുളസിദാസാണ്(42) അറസ്റ്റിലായത്. അടൂര്‍ കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

കുളനട പനങ്ങാട് സ്വദേശിയായ യുവാവുമായുള്ള വിവാഹം നടക്കുന്നതിനിടെ പോലീസ് പിടിയിലായ കൊട്ടാരക്കര ഇളമാട് ആക്കല്‍ ഷിബു വിലാസത്തില്‍ വി. ശാലിനിയുടെ സഹായിയാണ് ഇയാള്‍. ഒരു വര്‍ഷത്തോളമായി ഇവര്‍ ഒരുമിച്ച് കഴിയുകയായിരുന്നു. തുളസിദാസാണ് പത്രത്തില്‍ വിവാഹപരസ്യം നല്‍കിയത്. പിന്നീടു സഹോദരനാണെന്നു പറഞ്ഞ് ഫോണില്‍ യുവാവുമായി ബന്ധപ്പെട്ടതും ഇയാളാണ്. വിവാഹദിനത്തില്‍ ശാലിനി ധരിച്ച 50 പവന്‍ വരുന്ന ആഭരണങ്ങള്‍ മുക്കുപണ്ടമാണെന്നും പരിശോധനയില്‍ തെളിഞ്ഞു.

തുളസിദാസ് സഹോദരനാണെന്നാണ് ശാലിനി പോലീസിനോട് പറഞ്ഞിരുന്നത്. സംശയത്തിന്റെ അടിസ്ഥാനത്തില്‍ പോലീസ് ശാലിനിയെ കൊണ്ട് ഇയാളെ പന്തളം സ്‌റ്റേഷനില്‍ വിളിച്ചു വരുത്തി ചോദ്യം ചെയ്തപ്പോഴാണ് തട്ടിപ്പില്‍ ഇയാളുടെ പങ്ക് വ്യക്തമായത്.