അന്വേഷണത്തില്‍ ആശങ്കയേതുമില്ലാതെ ദിലീപ്

നടി ആക്രമിക്കപ്പെട്ട സംഭവവുമായി ബന്ധപ്പെട്ട് അന്വേഷണത്തില്‍ ആശങ്കയേതുമില്ലാതെ നടന്‍ ദിലീപ്.ഇപ്പോഴത്തെ അന്വേഷണത്തില്‍ ആശങ്കയില്ലെന്നും ഈ കേസുമായി ബന്ധപ്പെട്ട് യാതൊരു വിധ നിയമോപദേശവും താന്‍ തേടിയിട്ടില്ലെന്നും ദിലീപ് വ്യക്തമാക്കി.

ടിയുടെ ആക്രമവവുമായി ബന്ധപ്പെട്ട് ദിലീപിനെയും സുഹൃത്ത് നാദിര്‍ഷയെയും മാനേജര്‍ അപ്പുണ്ണിയെയും കഴിഞ്ഞ ദിവസം ഐജി ബി സന്ധ്യയുടെ നേതൃത്വത്തിലുള്ള സംഘം ആലുവ പൊലീസ് ക്ലബ്ബില്‍ വിളിച്ചു വരുത്തി മണിക്കൂറുകള്‍ നീണ്ട മൊഴിയെടുത്തിരുന്നു.ഇതേ തുടര്‍ന്ന് ദിലീപിനെതിരെ പൊലീസ് നടപടിയുണ്ടാകുമെന്ന തരത്തിലുള്ള വാര്‍ത്തകള്‍ ശക്തമായിരുന്നു.ദിലീപിന്റെ ഭാര്യയും നടിയുമായി കാവ്യയുടെ ഓണ്‍ലൈന്‍ വസ്ത്രവ്യാപാര കേന്ദ്രത്തിലും പൊലീസ് അന്വേഷണമുണ്ടായിരുന്നു.ഇതേ തുടര്‍ന്ന് ദിലീപ് നിയമോപദേശം തേടിയെന്ന തരത്തിലുള്ള വാര്‍ത്തകളാണ് പ്രചരിച്ചിരുന്നത്.എന്നാല്‍ നടന്‍ അത്തരത്തിലൊരു നീക്കവും നടത്തിയിട്ടില്ലെന്നുള്ള നിലയിലുറച്ചു നില്‍ക്കുകയാണ് അദ്ദേഹവും അദ്ദേഹത്തിന്റെ ഏറ്റവുമടുത്ത വൃത്തങ്ങളും.താന്‍ തെറ്റൊന്നും ചെയ്തിട്ടില്ലെന്നും സത്യം പുറത്തു വരണമെന്നാണ് തന്റെയും ആഗ്രഹമെന്നും ദിലീപ് അടുത്ത സുഹൃത്തുക്കളോടൊക്കെ പറഞ്ഞതായും റിപ്പോര്‍ട്ടുകളുണ്ട്.ഇപ്പോഴത്തെ അന്വേഷണത്തില്‍ പൂര്‍ണ തൃപ്തനാണെന്ന നിലയില്‍ തന്നെയാണ് അദ്ദേഹത്തിന്റെ പ്രതികരണം വരുന്നത്.