കോട്ടയത്തും തിരുവനന്തപുരത്തും ഇന്ന് സമാധാന ചര്‍ച്ച

സംസ്ഥാനത്ത് രാഷ്ട്രീയ അക്രമം വര്‍ദ്ധിക്കുന്നതില്‍ മുഖ്യമന്ത്രിക്ക് അതൃപ്തി. രാഷ്ട്രീയ അക്രമം നടന്ന തിരുവനന്തപുരത്തും കോട്ടയത്തും ഇന്ന് സിപിഎം- ബിജെപി നേതാക്കള്‍ കൂടിക്കാഴ്ച നടത്തി സമാധാന ചര്‍ച്ച നടത്തും.

കണ്ണൂര്‍ മോഡലില്‍ രാഷ്ട്രീയ അക്രമം തലസ്ഥാനത്ത് നടക്കുന്നതിലും അക്രമവുമായി ബന്ധപ്പെട്ട് സിപിഎം കൗണ്‍സിലറും എസ്എഫ്‌ഐ നേതാക്കളും പിടിയിലായതും അക്രമത്തിലുള്ള പാര്‍ട്ടിബന്ധവും മുഖ്യമന്ത്രിക്ക് കടുത്ത അതൃപ്തി ഉണ്ടാക്കിയതായിട്ടാണ് റിപ്പോര്‍ട്ട്.

അക്രമസംഭവങ്ങളില്‍ വിശദീകരണം തേടിയതിന് മുഖ്യമന്ത്രിയും ഡിജിപിയും ഗവര്‍ണറെ കണ്ടതില്‍ ഇടതുമുന്നണിക്ക് കടുത്ത അതൃപ്തിയുണ്ട്. കേന്ദ്രത്തിന്റെ നേതൃത്വത്തില്‍ സംസ്ഥാനത്തെ ഫെഡറല്‍ സംവിധാനത്തെ തകര്‍ക്കാനുള്ള ബിജെപിയുടെ ശ്രമത്തിന് മുഖ്യമന്ത്രി വഴങ്ങിയെന്നാണ് സിപിഐ യുടെ ആരോപണം. ഇക്കാര്യത്തില്‍ പിടിപ്പുകേടു വന്നതായും ഗവര്‍ണറെ കാണേണ്ടിയിരുന്നില്ലെന്നും സിപിഐ പറഞ്ഞു. എന്നാല്‍ ക്രിയാത്മകമായ നടപടിയായിരുന്നു അതെന്നായിരുന്നു മുഖ്യമന്ത്രിയുടെ പ്രതികരണം. തിരുവനന്തപുരത്ത് തൈക്കാട് ഗസ്റ്റ്ഹൗസില്‍ രാവിലെ ചേരുന്ന യോഗത്തില്‍ സിപിഎമ്മിന്റെയും ബിജെപിയുടെയും നേതാക്കള്‍ പങ്കെടുക്കുമെന്നാണ് വിവരം. കോട്ടയത്ത് ഉച്ചയ്ക്ക് രണ്ടരയ്ക്കാണ് ചര്‍ച്ച നടക്കുന്നത്.