ബ്ലാക്ക്‌മെയിലിംഗ്‌ നടത്തി പണം തട്ടാന്‍ ശ്രമം : രണ്ടുപേര്‍ പിടിയില്‍

ബ്ലാക്ക്‌മെയിലിംഗ്‌ നടത്തി പണം തട്ടാന്‍ ശ്രമിച്ച പെണ്‍വാണിഭ സംഘത്തിലെ രണ്ടുപേര്‍ പിടിയില്‍. നിലമ്പൂരിലെ പ്രമുഖ ഡോക്‌ടറെ പെണ്‍വാണിഭ സംഘം വയനാട്‌ ലക്കിടിയിലെ റിസോര്‍ട്ടില്‍ സൗഹൃദം നടിച്ച്‌ കൊണ്ടുപോയി അവിടെ വെച്ച്‌ രണ്ട്‌ സ്‌ത്രീകള്‍ ഉള്‍പ്പെടെ ആറ്‌ പേര്‍ ചേര്‍ന്ന്‌ സ്‌ത്രീകളില്‍ ഒരാളെ നഗ്നയാക്കി ഡോക്‌ടറുടെ കൂടെ നിര്‍ത്തി മൊബൈലില്‍ ഫോട്ടോ എടുത്തത്‌. ഡോക്‌ടറുടെ പേഴ്‌സ്‌ പിടിച്ചുവാങ്ങി അതിലുണ്ടായിരുന്ന 20,000 രൂപ എടുക്കുകയും 10 ലക്ഷം രൂപ തന്നില്ലെങ്കില്‍ മൊബൈലില്‍ എടുത്ത ഫോട്ടോകള്‍ മാധ്യമങ്ങള്‍ക്കും പോലീസിനും നല്‍കുമെന്നും ഇന്റര്‍നെറ്റിലും സോഷ്യല്‍ മീഡിയകളിലും ഇടുമെന്നു ഭീഷണിപ്പെടുത്തുകയും ചെയ്‌തു. നിരന്തരം ഫോണിലൂടെ പണം ആവശ്യപ്പെടുകയായിരുന്നു.

തുടര്‍ന്ന്‌ ഡോക്‌ടര്‍ പോലീസില്‍ പരാതി നല്‍കുകയായിരുന്നു. ഡോക്‌ടറെ കൊണ്ട്‌ പ്രതികളെ പണം തരാമെന്ന്‌ വിളിപ്പിച്ചാണ്‌ മുഖ്യ സൂത്രധാരനായ മുണ്ടേരി തമ്പുരാട്ടിക്കല്ല്‌ സ്വദേശി മണപ്പുറത്ത്‌ രതീഷിനെ(27) പിടികൂടിയത്‌. ഇയാളുടെ മൊഴിയുടെ അടിസ്‌ഥാനത്തിലാണ്‌ മറ്റൊരു പ്രതിയായ കുനിപ്പാല സ്വദേശി ഷിജോ തോമസ്‌(29) അരീക്കോട്‌ വെച്ച്‌ പോലീസിന്റെ പിടിയിലായത്‌. അന്വോഷണത്തില്‍ കൂടുതല്‍ പേര്‍ക്ക്‌ പങ്കുള്ളതായി പോലീസ്‌ പറഞ്ഞു.