ഫൈസല്‍ വധക്കേസിലെ പ്രതി വെട്ടേറ്റ് മരിച്ച നിലയില്‍

ഫൈസല്‍ വധക്കേസിലെ പ്രതി വെട്ടേറ്റ് മരിച്ച നിലയില്‍ കണ്ടെത്തി. കോടിഞ്ഞി ഫൈസല്‍ വധക്കേസിലെ പ്രതി വിപിനെയാണ് വെട്ടേറ്റ് മരിച്ച നിലയില്‍ കണ്ടെത്തിയത്. തിരൂര്‍ പുളിഞ്ചോട്ടില്‍ വച്ചാണ് സംഭവം. ഇന്ന് പുലര്‍ച്ചെ ഏഴരയോടെയാണ് റോഡരികില്‍ വെട്ടേറ്റ നിലയില്‍ കണ്ടെത്തിയത്. സംഭവമറിഞ്ഞ് നാട്ടുകാര്‍ ചേര്‍ന്ന് പോലീസില്‍ അറിയിക്കുകയായിരുന്നു. സ്വകാര്യ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.

മുഖത്തും കാലിനും നെഞ്ചിനും വെട്ടേറ്റിട്ടുണ്ട്. സംഘര്‍ഷസാധ്യത കണക്കിലെടുത്ത് വന്‍ പോലീസ് സംഘമാണ് ഇവിടെ ക്യാമ്പ് ചെയ്യുന്നത്. മതം മാറിയതിന്റെ പേരില്‍ കൊടിഞ്ഞി ഫൈസലിനെ കൊലപ്പെടുത്തുകയായിരുന്നു. ഈ കേസിലെ രണ്ടാം പ്രതിയാണ് വെട്ടേറ്റ് മരിച്ച വിപിന്‍.