തന്റെ വിവാഹത്തിന് പള്‍സര്‍ സുനിയെ ക്ഷണിച്ചിട്ടില്ല,കാവ്യയുടെ സഹോദരന്‍ മിഥുന്‍

കൊച്ചി: നടിയെ ആക്രമിച്ച കേസിലെ ഒന്നാം പ്രതിയായ പള്‍സര്‍ സുനി കാവ്യാ മാധവന്റെ സഹോദരന്‍ മിഥുന്‍ മാധവന്റെ കല്യാണത്തിന് പങ്കെടുത്തുവെന്ന വാര്‍ത്തയുടെ വിശദീകരണവുമായി മിഥുന്‍ രംഗത്തെത്തി. തന്റെ വിവാഹ ചടങ്ങുകളില്‍ പള്‍സര്‍ സുനി പങ്കെടുത്തിട്ടില്ലെന്ന് മിഥുന്‍ വ്യക്തമാക്കി

പള്‍സര്‍ സുനിയുമായി തനിക്കും തന്റെ കുടുംബത്തിലെ ആര്‍ക്കും യാതൊരു ബന്ധവുമില്ല. മാത്രമല്ല തങ്ങളുടെ വീട്ടില്‍ നടന്ന ചടങ്ങുകളിലൊന്നും സുനിയെ ക്ഷണിച്ചിട്ടില്ലെന്നും മിഥുന്‍ വ്യക്തമാക്കി. തന്റെ വിവാഹചടങ്ങില്‍ പള്‍സര്‍ സുനി പങ്കെടുത്തതായി അന്വേഷണസംഘം അറിയിച്ചെന്ന വാര്‍ത്ത വാസ്തവ വിരുദ്ധമാണെന്നും വിവാഹത്തിന്റെ ഫോട്ടോകളും വീഡിയോസും ഇതുവരെ അന്വേഷണ സംഘം ആവശ്യപ്പെടുകയോ കൈപ്പറ്റുകയോ ചെയ്തിട്ടില്ലെന്നും മിഥുന്‍ പറഞ്ഞു. തന്റെ ഫെയ്‌സ്ബുക്ക് പേജിലൂടെയാണ് അദ്ദേഹം ഇക്കാര്യം വ്യക്തമാക്കിയത്.

കാവ്യ മാധവന്റെയും തന്റെയും വസ്ത്ര വ്യാപാര സ്ഥാപനമായ ലക്ഷ്യയ്ക്ക് പള്‍സര്‍ സുനിയുമായോ, ഈ കേസുമായിട്ടോ യാതൊരു ബന്ധവുമില്ല. ജീവിതത്തിലെ കഠിനമായ ദിവസങ്ങളിലൂടെയാണ് ഇപ്പോള്‍ കടന്നുപോകുന്നതെന്നും ഇത്തവണ തങ്ങള്‍ ഓണം ആഘോഷിച്ചില്ലെന്നും മിഥുന്‍ വ്യക്തമാക്കുന്നു.