വിബിന്‍വധക്കേസ് : ഒന്നാംപ്രതി ലത്തീഫിന്റെ ഭാര്യ ഷാഹിദ അറസ്റ്റില്‍

കൊടിഞ്ഞി ഫൈസല്‍ വധക്കേസിലെ രണ്ടാം പ്രതിയുമായ ആലത്തിയൂര്‍ കുണ്ടില്‍ വിബിന്‍(24) കൊല്ലപ്പെട്ട കേസില്‍ എസ്.ഡി.പി.ഐ പ്രവര്‍ത്തകയായ യുവതി അറസ്റ്റില്‍. തൃശൂര്‍ സ്വദേശിനിയും കേസിലെ ഒന്നാം പ്രതിയുമായ എടപ്പാള്‍ വട്ടംകുളം ലത്തീഫിന്റെ ഭാര്യയുമായ ഷാഹിദ(32)യാണ് അറസ്റ്റിലായത്.

ബുധനാഴ്ച രാത്രിയില്‍ ചോദ്യം ചെയ്യാനായി കസ്റ്റഡിയിലെടുത്ത ഷാഹിദയെ പിന്നീട് അറസ്റ്റ് ചെയ്യുകയായിരുന്നു. ഭര്‍ത്താവ് ലത്തീഫിന്റെ നേതൃത്വത്തില്‍ എടപ്പാളിലെ വീട്ടില്‍ വെച്ചു പല തവണ ഗൂഢാലോചന നടത്തിയതായി പൊലീസ് കണ്ടെത്തി. കൊല്ലപ്പെടുന്നതിന് മുമ്പ് മൂന്ന് തവണ വിബിന് നേരെ വധശ്രമം നടത്തിയശേഷം സംഘം താമസിച്ചതും എടപ്പാളിലെ ഇവരുടെ വീട്ടിലായിരുന്നു. ഇക്കാര്യങ്ങളെല്ലാം ഷാഹിദക്ക് അറിയാമായിരുന്നെന്നാണ് പൊലീസ് പറയുന്നത്. സംഭവത്തെക്കുറിച്ച് അറിഞ്ഞിട്ടും മറച്ചുവെച്ചു എന്നതാണ് ഷാഹിദക്കെതിരെയുള്ള കുറ്റം. തിരൂര്‍ മജിസ്‌ട്രേറ്റിനു മുന്നില്‍ ഹാജരാക്കിയ ഷാഹിദയെ 14 ദിവസത്തേക്ക് റിമാന്‍ഡ് ചെയ്ത് മഞ്ചേരി സബ്ജയിലിലേക്ക് മാറ്റി.