ഇന്ധനവില വര്‍ധന ; കണ്ണന്താനത്തിന്റെ പ്രസ്താവന, ഐഎഎസ്സുകാരന്റെ വിവരക്കേടെന്ന് ചെന്നിത്തല !

ഇന്ധനവില സംബന്ധിച്ച കേന്ദ്രമന്ത്രി അല്‍ഫോന്‍സ് കണ്ണന്താനത്തിന്റെ പ്രസ്താവന ശുദ്ധ വിവരക്കേടെന്ന് പ്രതിപക്ഷ നേതാവ് രമേശ് ചെന്നിത്തല. ഇന്ധനവില വര്‍ദ്ധിച്ചാല്‍ അവശ്യ സാധനങ്ങളുടെ വില ഉയരുമെന്നും ഭാരം മുഴുവന്‍ സാധാരണ ജനങ്ങളുടെ പിടലിയ്ക്ക് വീഴുമെന്നും തിരിച്ചറിയാന്‍ ഐഎഎസ് എടുക്കേണ്ട കാര്യമില്ലെന്നും ചെന്നിത്തല പരിഹസിച്ചു.

ഇന്ധന വില വര്‍ദ്ധിക്കുന്നത് സമ്പന്നരെ ബാധിക്കുന്ന വിഷയമാണെന്ന കേന്ദ്രമന്ത്രി അല്‍ഫോന്‍സ് കണ്ണന്താനത്തിന്റെ പ്രസ്താവന ശുദ്ധവിവരക്കേടാണ്. കോര്‍പറേറ്റും ബിജെപിയും ചേര്‍ന്നുള്ള ഒത്തുകളിയാണ് ഇന്ധനവില ഉയര്‍ന്നു നില്‍ക്കാന്‍ കാരണമെന്നും ക്രൂഡോയിലിന്റെ വില വളരെയധികം താഴ്ന്ന് നില്‍ക്കുന്നതിന്റ പ്രയോജനം സാധാരണക്കാര്‍ക്ക് ലഭിക്കുന്നതിനായി പെട്രോളിന്റെയും ഡീസലിന്റെയും വില കുറയ്ക്കുന്നതിനുള്ള നടപടികള്‍ സര്‍ക്കാര്‍ ഉടന്‍ സ്വീകരിക്കണമെന്നും ചെന്നിത്തല തന്റെ ഫേസ്ബുക്ക് പേജില്‍ കുറിച്ചു.