ജനവിരുദ്ധനയത്തിനെതിരേ ഒരു കോടി ഒപ്പുകള്‍ ശേഖരിക്കാനൊരുങ്ങി പ്രതിപക്ഷ നേതാവ്‌

കേന്ദ്ര സംസ്ഥാന സര്‍ക്കാരുകളുടെ ജനവിരുദ്ധനയത്തിനെതിരേ ഒരു കോടി ഒപ്പുകള്‍ ശേഖരിക്കാനുള്ള ആശയവുമായി പ്രതിപക്ഷ നേതാവ് രമേശ് ചെന്നിത്തലയും കോണ്‍ഗ്രസും. പടുകൂറ്റന്‍ ബാനറില്‍ വീടുകള്‍ തോറും സന്ദര്‍ശനം നടത്തി ഒപ്പുകള്‍ ശേഖരിക്കാനാണ് പരിപാടി. ഒപ്പിടാന്‍ അറിയാത്തവര്‍ക്ക് വിരലടയാളം രേഖപ്പെടുത്താനാകും. കൂട്ടിത്തുന്നിയാല്‍ 70 കിലോമീറ്ററെങ്കിലും നീളം വരുന്ന ബാനറുകള്‍ക്ക് മുകളില്‍ 'കേന്ദ്ര സംസ്ഥാന സര്‍ക്കാരുകളുടെ ജനവഞ്ചനയ്ക്ക് എതിരേ പ്രതിപക്ഷനേതാവ് രമേശ് ചെന്നിത്തലയ്ക്ക് ഒപ്പം ഇതാ ഞങ്ങളുടെ കയ്യൊപ്പ്' എന്ന് രേഖപ്പെടുത്തിയ ബാനറാണ് ഇത്.

ഒപ്പുകള്‍ ശേഖരിച്ച ബാനറുകള്‍ ഒരുമിച്ചാക്കി രമേശ് ചെന്നിത്തല നടത്തുന്ന ജാഥയെത്തുമ്പോള്‍ മണ്ഡലം കമ്മറ്റികള്‍ പ്രതിപക്ഷ നേതാവിനെ ഏല്‍പ്പിക്കും. തൃശൂര്‍ മുതല്‍ വടക്കോട്ട് 21 നും എറണാകുളം മുതല്‍ തെക്കോട്ട് 28 നും ആയിരിക്കും ഭവന സന്ദര്‍ശനം നടക്കുക. പരിപാടികള്‍ ഒരാഴ്ച നീളും.