കണ്ണൂരില്‍ ബസ് കാത്തുനിന്നവരെ മറ്റൊരു ബസ് ഇടിച്ച് അപകടം;അമ്മയും മകനുമടക്കം അഞ്ചു പേര്‍ മരിച്ചു

കണ്ണൂര്‍:ബസ് പഞ്ചറായതിനെ തുടര്‍ന്ന് അടുത്ത സ്വകാര്യ ബസ് കാത്തു നിന്ന യാത്രക്കാര്‍ പിന്നാലെ വന്ന സ്വകാര്യ ബസിടിച്ചു മരിച്ചു.അപകടത്തില്‍ ഒരു അമ്മയ്ക്കും മകനും ഉള്‍പ്പടെ അഞ്ചു പേരുടെ ജീവന്‍ പൊലിഞ്ഞു.അപകടത്തില്‍ സാരമായ പരിക്കേറ്റഎട്ടുപേര്‍ പരിയാരം മെഡിക്കല്‍ കോളേജില്‍ ചികില്‍സയിലാണ് കണ്ണൂരിലെ മണ്ടൂരിലാണ് അപകടം.

പാപ്പിനിശ്ശേരി റെയില്‍വേ ഗേറ്റിനു സമീപം മുസ്തഫ(58), ഏഴോം സ്വദേശിനിയും പുതിയങ്ങാടി ജമാഅത്ത് സ്‌കൂള്‍ അധ്യാപികയുമായ സുബൈദ (40),മകന്‍ മുഫീദ്(18), ചെറുകുന്ന് അമ്പലപ്പുറം സ്വദേശിയും ഗ്രാഫിക് ഡിസൈനറുമായ സുജിത് പട്ടേരി (35), ചെറുവത്തൂരിലെ വ്യാപാരി പയ്യന്നൂര്‍ പെരുമ്പ സ്വദേശി കോളയത്ത് കരീം(35) എന്നിവരാണു മരിച്ചത്. ഇന്നലെ രാത്രി എട്ടോടെയാണ് അപകടം. പയ്യന്നൂരില്‍ നിന്നു പഴയങ്ങാടിയിലേക്കുള്ള അന്‍വിത എന്ന ബസിന്റെ ടയര്‍ മണ്ടൂര്‍ ടൗണിനടുത്ത് കേടായിരുന്നു.