വെട്ടിമാറ്റപ്പെട്ട കൈപ്പത്തി കൊല്ലപ്പെട്ട ആളുടേതല്ല, പിന്നെ ആ കൈപ്പത്തി ആരുടേത് ?

പത്തു വര്‍ഷം മുമ്പ്‌ വെട്ടിമാറ്റപ്പെട്ട നിലയില്‍ കണ്ടെത്തിയ കൈപ്പത്തി കൊല്ലപ്പെട്ട ആളുടേതല്ലെന്നു ഫോറന്‍സിക്‌ റിപ്പോര്‍ട്ട്‌. തലശേരിയില്‍ കൊലപാതകം നടന്ന സ്‌ഥലത്തിനടുത്തു നിന്നുമാണ് പൊലീസ് കൈപ്പത്തി കണ്ടെടുക്കുന്നത്. കൈപ്പത്തി മരിച്ചയാളുടേതല്ലെന്ന കണ്ടെത്തലോടെ പുലിവാല് പിടിച്ചത് പൊലീസിനാണ്. ഈ കൈപ്പത്തി ആരുടേത്‌ എന്ന ചോദ്യം പോലീസിനു തലവേദനയാകുന്നു.

എരഞ്ഞോളി കുടക്കളത്തെ സി.പി.എം. പ്രവര്‍ത്തകന്‍ മൂന്നാംകണ്ടി വീട്ടില്‍ കെ.എം. സുധീര്‍കുമാര്‍ കൊല്ലപ്പെട്ട കേസിന്റെ വിചാരണയ്‌ക്കു തയാറെടുക്കുന്ന പ്രോസിക്യൂഷന്‍ അഭിഭാഷകര്‍ കേസ്‌ രേഖകള്‍ പരിശോധിച്ചപ്പോഴാണ്‌ ഫോറന്‍സിക്‌ റിപ്പോര്‍ട്ട്‌ ശ്രദ്ധയില്‍പ്പെട്ടത്‌. 2007 നവംബറില്‍ കൊളശേരി കാവുംഭാഗം ഗവ. ഹയര്‍ സെക്കന്‍ഡറി സ്‌കൂളിനടുത്തുവച്ചാണ്‌ സുധീറിനെ കാര്‍ തടഞ്ഞുനിര്‍ത്തി വെട്ടിക്കൊലപ്പെടുത്തിയത്‌. ഒരു കൈപ്പത്തി വെട്ടിമാറ്റിയിരുന്നു.