അന്തരീക്ഷ മലിനീകരണം : ഡല്‍ഹിയില്‍ വീണ്ടും വാഹന നിയന്ത്രണം

നഗരത്തില്‍ മലിനീകരണം വ്യാപകമാകുന്ന സാഹചര്യത്തില്‍ വീണ്ടും വാഹന നിയന്ത്രണം വരുന്നു. നവംബര്‍ 13 മുതല്‍ അഞ്ച് ദിവസത്തേക്ക് വീണ്ടും ഓഡ് ഈവന്‍ രീതി നടപ്പിലാക്കുമെന്ന് ഡല്‍ഹി ഗതാഗത മന്ത്രി കൈലാഷ് ഗെലോട്ട് വ്യക്തമാക്കി. ഡല്‍ഹിയിലെ അന്തരീക്ഷ മലിനീകരണം വ്യാപകമാകുന്ന സാഹചര്യത്തിലാണ് നടപടി. മന്ത്രിമാരടക്കം എല്ലാവരും ഓഡ് ഈവന്‍ സംവിധാനത്തോട് സഹകരിക്കണമെന്ന് ഗെലോട്ട് അഭ്യര്‍ത്ഥിച്ചു.

ഓഡ്, ഈവന്‍ സ്‌കീം പ്രകാരം ഒറ്റ, ഇരട്ട അക്ക നമ്പര്‍ വാഹനങ്ങള്‍ക്ക് ഇടവിട്ടുള്ള ദിവസങ്ങളില്‍ മാത്രമേ നിരത്തില്‍ ഇറക്കാന്‍ അനുമതി ഉണ്ടായിരിക്കുകയുള്ളൂ. രാവിലെ എട്ട് മണി മുതല്‍ വൈകിട്ട് എട്ട് മണി വരെയാണ് വാഹന നിയന്ത്രണം. കഴിഞ്ഞ വര്‍ഷം ജനുവരിയിലാണ് ഡല്‍ഹിയില്‍ ആദ്യമായി ഒറ്റ, ഇരട്ട അക്ക വാഹന നിയന്ത്രണം ഏര്‍പ്പെടുത്തിയത്. രണ്ടാഴ്ചത്തേക്കായിരുന്നു അന്ന് നിയന്ത്രണം ഏര്‍പ്പെടുത്തിയത്.