തോമസ് ചാണ്ടി രാജിവെച്ചു, പിണറായി സർക്കാറിന്റെ മൂന്നാമത്തെ രാജി

ഗതാഗത മന്ത്രി തോമസ് ചാണ്ടി രാജിവെച്ചു. തോമസ് ചാണ്ടി രാജിവച്ചതിനു പകരം ആരും മന്ത്രിസഭയിലേക്ക് എത്തില്ല. മന്ത്രിസ്ഥാനം ഒഴിച്ചിടും. പാര്‍ട്ടിയുടെ രണ്ട് എം.എല്‍.എമാരില്‍ ആദ്യം ആരാണോ കുറ്റവിമുക്തനാകുന്നത് അയാള്‍ മന്ത്രിയാകണമെന്നും തോമസ് ചാണ്ടി ആവശ്യപ്പെട്ടുവെന്നാണ് അറിയുന്നത്. മന്ത്രിസഥാനം മറ്റാര്‍ക്കും നല്‍കില്ലെന്ന് മുഖ്യമന്ത്രിയും തോമസ് ചാണ്ടിക്ക് ഉറപ്പുനല്‍കി. പിണറായി വിജയൻ സർക്കാരിൽ നിന്നു രാജി വെയ്ക്കുന്ന മൂന്നാമത്തെ മന്ത്രിയാണ് തോമസ് ചാണ്ടി.

ഫോണ്‍വിളി വിവാദത്തില്‍ പെട്ട എ.കെ ശശീന്ദ്രന്റെ കേസ് കോടതിയില്‍ എത്തിയിരുന്നു. പരാതിക്കാരി കേസ് പിന്‍വലിച്ചതോടെ ശശീന്ദ്രന്‍ വൈകാതെ കുറ്റവിമുക്തനാകുമെന്നാണ് അദ്ദേഹത്തിന്റെ അടുപ്പക്കാര്‍ കരുതുന്നത്.ഇന്ന് ഉച്ചയ്ക്ക് 12.45 ഓടെ രാജിക്കത്ത് പീതാംബരന്‍ മാസ്റ്റര്‍ മുഖ്യമന്ത്രി പിണറായി വിജയന് കൈമാറിയത്. തോമസ് ചാണ്ടിയുടെ രാജിക്കത്ത് ലഭിച്ചുവെന്നും അത് ഗവര്‍ണര്‍ക്ക് അയച്ചുവെന്നും മുഖ്യമന്ത്രി സ്ഥിരീകരിച്ചു. പകരം മന്ത്രിയുണ്ടാകുമോ എന്നതടക്കം ബാക്കികാര്യം പിന്നെ നോക്കാമെന്നും അദ്ദേഹം അറിയിച്ചു.