എംജിആറിനെയും ജയലളിതയേയും തകര്‍ക്കാന്‍ കെല്‍പ്പുള്ളവര്‍ ജനിച്ചിട്ടില്ല, ജനിക്കുകയുമില്ല : പളനിസ്വാമി

ജനാധിപത്യത്തില്‍ ആര്‍ക്കും രാഷ്ട്രീയത്തില്‍ പ്രവേശിക്കാം, പക്ഷേ തങ്ങളുടെ ജന സ്വാധീനം തകര്‍ക്കാന്‍ ആര്‍ക്കുമാകില്ലെന്നാണ് ഭരണകക്ഷിയായ അണ്ണാ ഡിഎംകെയുടെ വെല്ലുവിളി. തമിഴ്‌നാട്ടിലെ ജനങ്ങള്‍ എക്കാലത്തും അണ്ണാ ഡിഎംകെ സ്ഥാപകന്‍ എംജിആറിനും അദ്ദേഹത്തിന്റെ പിന്‍ഗാമിയായ ജയലളിതയ്ക്കും മാത്രമേ വോട്ട് ചെയ്യൂവെന്നും. ഞങ്ങളുടെ വോട്ട് ബാങ്കില്‍ വിള്ളല്‍ വീഴ്ത്താന്‍ ആര്‍ക്കും ആകില്ലെന്നും പാര്‍ട്ടി അവകാശപ്പെട്ടു.

രജനികാന്തിന്റെ പ്രഖ്യാപനമടങ്ങിയ പ്രസ്താവന ഇതുവരെ വായിച്ചിട്ടില്ല. എന്തായാലും അത് അദ്ദേഹത്തിന്റെ തീരുമാനമാണ്. രാഷ്ട്രീയത്തില്‍ പ്രവേശിക്കുമെന്ന് മാത്രമേ അദ്ദേഹം വ്യക്തമാക്കിയിട്ടുള്ളൂ എന്നാണ് മനസ്സിലാകുന്നത്. എന്തായാലും അണ്ണാ ഡിഎംകെയെ തകര്‍ക്കാന്‍ കെല്‍പ്പുള്ളവര്‍ ഇതുവരെ ജനിച്ചിട്ടില്ല, ഇനിയൊട്ട് ജനിക്കുകയുമില്ലെന്ന് മുഖ്യമന്ത്രി ഇടപ്പാടി പളനി സ്വാമി പറഞ്ഞു. എന്നാല്‍, ഇന്ത്യയില്‍ ജനിച്ച ഏതൊരു പൗരനും രാഷ്ട്രീയത്തില്‍ പ്രവേശിക്കാന്‍ അവകാശമുണ്ടെന്ന് ഒ പനീര്‍സെല്‍വം പ്രതികരിച്ചു.