ഓഖി ദുരന്തനിവാരണ ഫണ്ട് ഉപയോഗിച്ച് ഹെലികോപ്റ്റര്‍ യാത്ര ; എട്ട് അംഗ കേന്ദ്രസംഘത്തിന് ചെലവിട്ടത് 10.5 ലക്ഷം, മുഖ്യമന്ത്രിക്ക് എട്ടുലക്ഷം !

ഓഖി ദുരന്തനിവാരണ ഫണ്ട് ഉപയോഗിച്ച് മുഖ്യമന്ത്രി ഹെലികോപ്റ്റര്‍ യാത്ര നടത്തിയ സംഭവം വിവാദമായതോടെ പാര്‍ട്ടി ഫണ്ടില്‍നിന്നു പണമടച്ച് തലയൂരാന്‍ നീക്കം നടത്തുകയാണ് സിപിഎം. എട്ട് അംഗങ്ങള്‍ വന്ന കേന്ദ്ര സമിതിക്കായി 10.5 ലക്ഷം ചെലവിട്ടപ്പോള്‍ സംഘത്തെ കാണാനായി എത്തിയ മുഖ്യമന്ത്രിക്ക് എട്ടുലക്ഷം രൂപ ചെലവാക്കി. റവന്യൂ വകുപ്പ് സെക്രട്ടറി തന്നെയായിരുന്നു രണ്ടു തുകയും അനുവദിച്ച് ഉത്തരവിറക്കിയത്. വിവാദം സര്‍ക്കാരിനും പാര്‍ട്ടിക്കും മങ്ങലേല്‍പ്പിച്ചെന്നാണു സി.പി.എം. നേതൃത്വത്തിന്റെ വിലയിരുത്തല്‍. ഇതേ തുടര്‍ന്നാണ് പാര്‍ട്ടി ഫണ്ടില്‍ നിന്നും പണം നല്‍കാന്‍ തീരുമാനിച്ചത്. പാര്‍ട്ടി സമ്മേളനത്തില്‍ പങ്കെടുക്കാന്‍ ഹെലികോപ്ടര്‍ ഉപയോഗിച്ചതിന്റെ ചെലവ് പാര്‍ട്ടി ഫണ്ടില്‍നിന്നു നല്‍കാനാണു നീക്കം.ഇക്കാര്യം ഇന്നു ചേരുന്ന സി.പി.എം. സംസ്ഥാന സെക്രട്ടേറിയറ്റ് ചര്‍ച്ചചെയ്യും.