ഷുഹൈബിന്റെ കൊലപാതകം: നിയമസഭയില്‍ ഇന്നും പ്രതിപക്ഷ ബഹളം

യൂത്ത് കോണ്‍ഗ്രസ് പ്രവര്‍ത്തകന്‍ ഷുഹൈബ് കൊല്ലപ്പെട്ട കേസ് ഉയര്‍ത്തി നിയമസഭയില്‍ ഇന്നും പ്രതിപക്ഷ ബഹളം. ബാനറും പ്‌ളക്കാര്‍ഡുമായി പ്രതിപക്ഷം സ്പീക്കറുടെ ഡയസിന് മുന്നില്‍ പ്രതിഷേധിച്ചതോടെ ചോദ്യോത്തരവേള ഇന്നും തടസ്സപ്പെട്ടു. സിബിഐ അന്വേഷണം ആവശ്യപ്പെട്ടാണ് ബഹളം. ബാനറും പ്‌ളക്കാര്‍ഡുമായി നടുത്തളത്തിലിറങ്ങിയ പ്രതിപക്ഷം സ്പീക്കറുടെ ഡയസിന് മുന്നില്‍ എത്തുകയായിരുന്നു. തുടര്‍ന്ന് ചോദ്യോത്തരവേള ബഹളത്തില്‍ മുങ്ങി.

സ്പീക്കറുടെ റൂളിംഗിനെ മറികടന്നായിരുന്നു പ്രതിഷേധം. തുടര്‍ന്ന് തന്റെ മുഖം മറച്ചുള്ള പ്രതിഷേധം അംഗീകരിക്കില്ലെന്ന് സ്പീക്കര്‍ വ്യക്തമാക്കി. ബഹളം നടക്കുമ്പോള്‍ പ്രതിപക്ഷ നേതാവ് മിണ്ടാതിരിക്കുന്നത് ശരിയല്ലെന്നും പറഞ്ഞു. ഷുഹൈബ് വധത്തില്‍ സിബിഐ അന്വേഷണം വേണമെന്ന് ആവശ്യപ്പെട്ട് ഇന്നലെയും പ്രതിപക്ഷം നടുത്തളത്തിലിറങ്ങിയിരുന്നു.