ഹൈക്കോടതിയിലെ രണ്ട് ജഡ്ജിമാര്‍ക്കും ലോകായുക്തയ്ക്കുമെതിരെ ജേക്കബ് തോമസ് കേന്ദ്ര വിജിലന്‍സ് കമ്മീഷണര്‍ക്ക് പരാതി നല്‍കി

വിജിലന്‍സ് കേസുകള്‍ ദുര്‍ബ്ബലമാക്കുന്നുവെന്ന് ആരോപിച്ച് ഹൈക്കോടതിയിലെ രണ്ട് ജഡ്ജിമാര്‍ക്കും ലോകായുക്തയ്ക്കുമെതിരെ മുന്‍ വിജിലന്‍സ് ഡയറക്ടര്‍ ഡിജിപി ജേക്കബ് തോമസ് ഐപിഎസ് കേന്ദ്ര വിജിലന്‍സ് കമ്മീഷണര്‍ക്ക് പരാതി നല്‍കി. ഹൈക്കോടതി ജഡ്ജിമാരായ പി.ഉബൈദ്, ഏബ്രഹാം മാത്യൂ എന്നിവര്‍ക്കെതിരെയും ലോകായുക്ത ജസ്റ്റീസ് പയസ് സി. കുര്യാക്കോസിനും എതിരെയാണ് പരാതി. ചീഫ് സെക്രട്ടറി മുഖേനയാണ് പരാതി നല്‍കിയത്.

ഇവര്‍ക്കെതിരെ നിഷ്പക്ഷമായ അന്വേഷണം വേണമെന്ന് ജേക്കബ് തോമസ് ആവശ്യപ്പെടുന്നു. വിജിലന്‍സ് കേസുകള്‍ ഇവര്‍ ദുര്‍ബ്ബലമാക്കുന്നുവെന്നും വിജിലന്‍സിന്റെ അഴിമതി വിരുദ്ധ നീക്കത്തിന്റെ മുനയൊടിച്ചുവെന്നും ജേക്കബ് തോമസ് പറയുന്നു. ജഡ്ജിമാര്‍ക്കെതിരെ തെളിവ് നല്‍കാന്‍ താന്‍ തയ്യാറാണെന്നും ജേക്കബ് തോമസ് പറയുന്നു.