എഐഎഡിഎംകെ ജനറല്‍ സെക്രട്ടറി ശശികലയുടെ ഭര്‍ത്താവ് എം നടരാജന്‍ അന്തരിച്ചു

എഐഎഡിഎംകെ ജനറല്‍ സെക്രട്ടറി ശശികലയുടെ ഭര്‍ത്താവ് എം നടരാജന്‍ (76) അന്തരിച്ചു. ഇന്ന് പുലര്‍ച്ചെ ഒന്നരയോടെയായിരുന്നു അന്ത്യം. അഴിമതിക്കേസില്‍ പരപ്പന അഗ്രഹാര ജയിലില്‍ കഴിയുകയാണ് ശശികല. അഞ്ചുമാസം മുന്‍പ് കരള്‍, വൃക്ക മാറ്റ ശസ്ത്രക്രിയയ്ക്ക് വിധേയനായിരുന്നു നടരാജനെ രണ്ടാഴ്ച മുന്‍പ് ആരോഗ്യ പ്രശ്‌നങ്ങളെത്തുടര്‍ന്ന് വീണ്ടും ആശുപത്രിയില്‍ പ്രവേശിപ്പിക്കുകയായിരുന്നു. ശനിയാഴ്ച രാത്രി കടുത്ത നെഞ്ചുവേദനയെത്തുടര്‍ന്ന് വെന്റിലേറ്ററിന്റെ സഹായത്തോടെയാണ് കഴിഞ്ഞിരുന്നത്.

ഭര്‍ത്താവിന്റെ ആരോഗ്യ നില കാണിച്ച് ശശികല നല്‍കിയ പരോള്‍ ഹര്‍ജി ഒക്‌ടോബറില്‍ കോടതി പരിഗണിക്കുകയും നടരാജനെ ആശുപത്രിയില്‍ പ്രവേശിപ്പിച്ചപ്പോള്‍ അഞ്ചു ദിവസത്തെ പരോള്‍ അനുവദിക്കുകയും ചെയ്തു. വര്‍ഷങ്ങളായി പൊതുരംഗത്ത് സജീവമല്ലാത്ത നടരാജന്‍ ജയലളിതയുടെ മരണത്തെത്തുടര്‍ന്ന് വീണ്ടും എത്തി. പാര്‍ട്ടി പ്രവര്‍ത്തനങ്ങളിലേര്‍പ്പെട്ടിരുന്നില്ലെങ്കിലും പനീര്‍സെല്‍വം ശശികലയ്‌ക്കെതിരെ ശബ്ദം ഉയര്‍ത്തിയപ്പോള്‍ ഭാര്യയ്ക്ക് പിന്തുണയുമായി എത്തിയിരുന്നു.