ഹര്‍ത്താലിന്റെ മറവില്‍ താനൂരില്‍ വ്യാപക അക്രമം

താനൂര്‍: ഹര്‍ത്താലിന്റെ മറവില്‍ താനൂരില്‍ വ്യാപക അക്രമം. നാല് KSRTC ബസ്സുകളും പത്തോളം കടകളും ഹര്‍ത്താല്‍ അനുകൂലികള്‍ അടിച്ചു തകര്‍ത്തു. പ്രദേശത്ത് ഏഴ് ദിവസത്തേക്ക് നിരോധനാജ്ഞ പ്രഖ്യാപിച്ചിട്ടുണ്ട്. രാവിലെ 9 മണിയോടെയാണ് ഹര്‍ത്താല്‍ അനുകൂലികള്‍ താനൂരിന്റെ വിവിധ ഭാഗങ്ങളിലായി ബസ്സ് തടഞ്ഞ് അക്രമണം അഴിച്ചുവിട്ടത്. ഗുരുവായൂര്‍ റൂട്ടിലോടുന്ന KSRTC ബസ്സുകളില്‍ മൂന്ന് ബസ്സുകളുടെ മുഴുവന്‍ ചില്ലുകള്‍ പൂര്‍ണമായും ഒരു ബസ്സിന്റെ ചില്ല് ഭാഗികമായും തകര്‍ക്കപ്പെട്ടു. യാത്രക്കാരെ ബസ്സില്‍ നിന്നും ഇറക്കിവിട്ട് സീറ്റുകളും ഹെഡ് ലൈറ്റും അടിച്ചു തകര്‍ത്തു. കുട്ടികളും സ്ത്രീകളുമടങ്ങുന്ന യാത്രക്കാര്‍ക്ക് വലിയ പ്രയാസം നേരിടേണ്ടി വന്നു. ഉച്ചവെയിലത്ത് ദാഹജലം പോലും കിട്ടാതെയാണ് ഇവര്‍ക്ക് തകര്‍ക്കപ്പെട്ട ബസ്സില്‍ നിന്നും റെയില്‍വേ സ്റ്റേഷനിലേക്ക് പോകേണ്ടി വന്നത്. അടച്ചിട്ട കടകളുടെ പൂട്ട് പൊളിച്ചാണ് കുക്കള്‍ക്കുള്ളിലെ ഫര്‍ണീച്ചറുകളും കച്ചവട സാധനങ്ങളടക്കം സകലതും അക്രമികള്‍ അടിച്ചു തകര്‍ത്തത്. K.R ബേക്കറി പൂര്‍ണ്ണമായും തകര്‍ക്കപ്പെട്ടു. ചെറിയ തീപ്പൊരി കൊണ്ട് പോലും വലിയ സ്‌ഫോടനത്തിന് സാധ്യതയുള്ള ബീച്ച് റോട്ടിലെ പടക്ക കട തകര്‍ത്ത് അതിലെ പടക്കങ്ങള്‍ ഉപയോഗിച്ചാണ് അക്രമികള്‍ പോലീസുമായി ഏറ്റുമുട്ടിയത്. ലാത്തിച്ചാര്‍ജില്‍ ഏഴോളം പോലീസുകാര്‍ക്ക് പരിക്കു പറ്റി ആശുപത്രിയില്‍ പ്രവേശിപ്പിച്ചു. ക്ലാസിക് സ്റ്റുഡിയോ, ഷറഫിയ ട്രാവല്‍സ്, രണ്ട് ലോട്ടറി കടകള്‍, വെസ്റ്റിഡോ ടെക്സ്റ്റയില്‍സ് തുടങ്ങി പത്തോളം കടകളാണ് അക്രമണത്തിന് ഇരയായത്. സംഭവസ്ഥലം താനൂര്‍ MLA വി. അബ്ദുറഹിമാന്‍, CPIM ജില്ല സെക്രട്ടറിയേറ്റ് അംഗം ഇ.ജയന്‍, ഏരിയ സെക്രട്ടറി അബ്ദുള്‍ റസാഖ്, സമദ് താനാളൂര്‍ എന്നിവര്‍ സന്ദര്‍ശിച്ചു.