മെകുനു ആഞ്ഞടിച്ചു;ഒമാനില്‍ മൂന്നു മരണം

ഒമാന്‍:ഒമാനില്‍ വന്‍ നാശം വിതച്ച് മെകുനു ആഞ്ഞുവീശി.സ്വദേശിയായ ഒരു പെണ്‍കുട്ടിയും ഒരു ഇന്‍ഡ്യക്കാരനും ഉള്‍പ്പടെ മൂന്നുപേരുടെ ജീവന്‍ കവര്‍ന്ന മെകുനുവിന്റെ ശക്തി കുറഞ്ഞ് കാറ്റഗറി ഒന്നിലേയ്‌ക്കെത്തി.തീരത്താഞ്ഞടിച്ച കാറ്റ് മൂലം മേഖലയില്‍ കനത്തമഴയും വെള്ളപ്പൊക്കവും തുടരുകയാണ്‌

മണ്ണിടിഞ്ഞും മതിലിടിഞ്ഞും നിരവധി പേര്‍ക്ക് പരിക്കേറ്റു. ദോഫര്‍ ഗവര്‍ണറേറ്റിലും അയല്‍ പ്രദേശവും യെമന്‍ പ്രവിശ്യയുമായ അല്‍ മഹ്‌റയിലും

കനത്ത നാശമാണ് മെകുനു സൃഷ്ടിച്ചത്.

കനത്ത മഴയും കാറ്റും ശനിയാഴ്ച പകലും തുടര്‍ന്നു. ജീവകാരുണ്യ സഹായവുമായി ഇന്ത്യന്‍ നാവിക സേനയുടെ ഐഎന്‍എസ് ദീപകും ഐഎന്‍എസ് കൊച്ചിയും സലാലയിലേക്കു തിരിച്ചു. പേമാരിയുടെയും ശക്തമായ കാറ്റിന്റെയും അകമ്ബടിയോടെ വെള്ളിയാഴ്ച അര്‍ധരാത്രിക്കുശേഷമാണ് മെകുനു ചുഴലിക്കാറ്റ് ഒമാന്‍ തീരം തൊട്ടത്. വേഗം കുറഞ്ഞ് കാറ്റഗറി ഒന്ന് വിഭാഗത്തിലുള്ള കാറ്റായി ദോഫാര്‍ ഗവര്‍ണറേറ്റിന്റെ റായ്‌സൂത്ത്, റഖിയൂത്ത് മേഖലയിലാണ് കാറ്റ് പ്രവേശിച്ചത്.

126-146 കിലോമീറ്റര്‍ വേഗത്തില്‍ എത്തിയ ചുഴലിക്കാറ്റ് ദോഫര്‍ മേഖലയില്‍ കനത്ത നാശവും ഭീതിയും വിതച്ചു. മഴ വെള്ളപൊക്കത്തിന് കാരണമായി. അര്‍ധ രാത്രി മുതല്‍ പുലര്‍ച്ചെവരെ ശക്തമായ കാറ്റ് തുടര്‍ന്നറോഡുകള്‍ ചളിയും വെള്ളവും കയറി തകര്‍ന്നു. വൈദ്യതി, ട്രാഫിക് സിഗ്നല്‍ പോസ്റ്റുകള്‍ തകര്‍ന്നു. മരങ്ങള്‍ വ്യാപകമായി കടപുഴകി വീണു. കാര്‍ഷിക മേഖലയായ സലാലയില്‍ വ്യാപകമായി കൃഷി നശിച്ചു. . അപകടത്തില്‍പെട്ട മൂന്ന പേരെ രക്ഷപ്പെടുത്തി. ഇവര്‍ സുഖം പ്രാപിച്ചു വരുന്നു. സലാല തുറമുഖത്ത് മത്സ്യ ബന്ധന ബോട്ടിലുണ്ടായിരുന്ന 260 പേരെ സുരക്ഷിത സ്ഥാനത്തേക്ക് മാറ്റി. അടുത്ത 24 മണിക്കൂറും കരുതലോടെയിരിക്കണമെന്ന് കാലാവസ്ഥ വിഭാഗം മുന്നറിയിപ്പ് നല്‍കി. രാജ്യത്തെ പൊതു, സ്വകാര്യ വിദ്യാഭ്യാസ സ്ഥാപനങ്ങള്‍ക്ക് ഞായറാഴ്ച മുതല്‍ മൂന്നു ദിവസത്തേക്ക് അവധി നല്‍കി.