ബിഡിജെഎസ് അഞ്ച് സീറ്റില്‍

കൊച്ചി : ബി.ഡി.ജെ.എസും ബി.ജെ.പിയും തമ്മില്‍ ലോക്സഭാ സീറ്റ് ധാരണയിലെത്തി. ബി.ഡി.ജെ.എസിന് അഞ്ചു സീറ്റുകള്‍ നല്‍കും. ഇരു പാര്‍ട്ടികളുടെയും കമ്മിറ്റികള്‍ അംഗീകരിച്ചശേഷം സീറ്റുകളും സ്ഥാനാര്‍ത്ഥികളെയും പ്രഖ്യാപിക്കും. ബി.ഡി.ജെ.എസ് പ്രസിഡന്റ് തുഷാര്‍ വെള്ളാപ്പള്ളി, ജനറല്‍ സെക്രട്ടറി സുഭാഷ് വാസു, ബി.ജെ.പി ദേശീയ ജനറല്‍ സെക്രട്ടറി മുരളീധരറാവു, ദേശീയ സമിതിയംഗം പി.കെ. കൃഷ്ണദാസ്, സംസ്ഥാന പ്രസിഡന്റ് പി.എസ്. ശ്രീധരന്‍പിള്ള എന്നിവരും ചര്‍ച്ചയില്‍ പങ്കെടുത്തു. സീറ്റുധാരണയിലെത്തിയതായി തുഷാര്‍ വെള്ളാപ്പള്ളിയും പി.എസ്. ശ്രീധരന്‍പിള്ളയും ചര്‍ച്ചയ്ക്കുശേഷം പറഞ്ഞു. ബി.ജെ.പിയുമായി യാതൊരു പരിഭവവുമില്ലെന്നും തുഷാര്‍ പറഞ്ഞു. സ്ഥാനാര്‍ത്ഥികള്‍ ആരെന്ന് പാര്‍ട്ടി കമ്മിറ്റി ചേര്‍ന്ന് തീരുമാനിക്കും. പാര്‍ട്ടിയെ നയിക്കുന്നയാളെന്ന നിലയില്‍ എല്ലായിടത്തും പ്രവര്‍ത്തിക്കാനും ഭംഗിയായി കാര്യങ്ങള്‍ നടത്താനുമാണ് താന്‍ മത്സരിക്കില്ലെന്ന് പറഞ്ഞത്. അതില്‍ മാറ്റം വേണോയെന്ന് പാര്‍ട്ടി തീരുമാനിക്കും. ദേശീയ നേതൃത്വത്തിന്റെ അംഗീകാരത്തോടെ ധാരണ പരസ്യമാക്കുമെന്ന് ശ്രീധരന്‍ പിള്ള പറഞ്ഞു. സൗഹാര്‍ദ്ദപരമായി ഹൃദയത്തില്‍ തട്ടിയ ബന്ധം ഒറ്റക്കെട്ടായി തുടരും. ഒരേ തൂവല്‍ പക്ഷികളായി പ്രവര്‍ത്തിച്ച് തിരഞ്ഞെടുപ്പിനെ നേരിടും. രാത്രി പത്തിനാരംഭിച്ച ചര്‍ച്ച 11.30നാണ് സമാപിച്ചത്.