പറന്നിറങ്ങുന്ന വികസനം

  ഒടുവില്‍ ശബരിമല വിമാന താവളം കോട്ടയത്ത് ലാന്റ് ചെയ്യുകയാണ്. എരുമേലിക്കു സമീപത്തെ ചെറുവള്ളി എസ്റ്റേറ്റ് ഏറ്റെടുക്കാന്‍ സര്‍ക്കാര്‍ വിജ്ഞാപനമിറക്കിയതോടെ വിമാനത്താവള പദ്ധതി നിര്‍ണായക ഘട്ടത്തിലേക്കു കടന്നിരിക്കുകയാണ്. ഒരു വര്‍ഷത്തിനുള്ളില്‍ പദ്ധതിക്കാവശ്യമായ 2263 ഏക്കര്‍ സ്ഥലം ഏറ്റെടുക്കും. മുഖ്യമന്ത്രി പിണറായി വിജയന്റെ ഓഫിസ് വിമാനത്താവള പദ്ധതിക്കു മേല്‍നോട്ടം വഹിക്കുമ്പോള്‍, കണ്ണൂര്‍ വിമാനത്താവളം മാനേജിങ് ഡയറക്ടറും ശബരിമല വിമാനത്താവള പദ്ധതി സ്‌പെഷല്‍ ഓഫിസറുമായ വി. തുളസീദാസിന്റെ നേതൃത്വത്തിലുള്ള ഉദ്യോഗസ്ഥ സംഘമാണു പദ്ധതിയുടെ പ്രവര്‍ത്തനങ്ങള്‍ ഏകോപിപ്പിക്കുന്നത്. സ്ഥലം ഏറ്റെടുക്കുന്നതോടെ കേന്ദ്ര വ്യോമയാന മന്ത്രാലയത്തില്‍നിന്ന് അനുമതിക്കായുള്ള ശ്രമങ്ങള്‍ ആരംഭിക്കാനാണ് ശബരിമല വിമാനത്താവളം പദ്ധതി സ്‌പെഷല്‍ ഓഫിസിന്റെ ആലോചന. ഇതിനു മുന്നോടിയായുള്ള നടപടി ക്ജ്ഞങ്ങള്‍ ആസ്ലഭിച്ചു. എല്ലാ ആധുനിക സൗകര്യങ്ങളും ഉള്‍പ്പെടുന്ന രാജ്യാന്തര വിമാനത്താവളമാണ് ശബരിമലയില്‍ നിര്‍മിക്കുന്നതെന്നാണു സൂചന. കോട്ടയം, ഇടുക്കി, പത്തനംതിട്ട ജില്ലകളുടെ വികസനത്തിനും കേരളത്തിന്റെതന്നെ ഭാവി വളര്‍ച്ചയ്ക്കും വിമാനത്താവളം മുതല്‍ക്കൂട്ടാകും കായല്‍ടൂറിസം മേഖലയും ഇതോടെ ദൂരങ്ങളില്‍നിന്നെത്തുന്ന സഞ്ചാരികളുടെ അരികിലെത്തുന്നു. തേക്കടി, മൂന്നാര്‍, ഗവി, വാഗമണ്‍ എന്നിവിടങ്ങളിലേക്കുള്ള വിനോദ സഞ്ചാരികള്‍, കോട്ടയം, പത്തനംതിട്ട ജില്ലകളിലെ പ്രവാസികള്‍ എന്നിവരില്‍നിന്നുള്ള വരുമാനം വിമാനത്താവളത്തിനു ലാഭകരമായി പ്രവര്‍ത്തിക്കാന്‍ വഴിയൊരുക്കുമെന്നാണു പ്രതീക്ഷ. സുഗന്ധ വ്യഞ്ജനവും റബറും ഉള്‍പ്പെടുന്ന മലയോര കാര്‍ഷിക മേഖലയിലെ ചരക്കുനീക്കവും വിമാനത്താവളത്തിന്റെ ഭാവിവരുമാനത്തിലേക്കുള്ള വാതിലുകളാണ്. ഇവിടെനിന്നു ശബരിമലയിലേക്കുള്ള ദൂരം 48 കിലോമീറ്റര്‍ മാത്രമാണെന്നിരിക്കെ, വിദൂരസംസ്ഥാനങ്ങളില്‍നിന്നു പോലും എത്തുന്ന അയ്യപ്പഭക്തരുടെ സുഗമയാത്രയ്ക്കു വിമാനത്താവളം പ്രയോജനകരമാവും. വിമാനത്താവളം യാഥാര്‍ഥ്യമാകുന്നതോടെ കിഴക്കന്‍ കോട്ടയത്തെ കാത്തിരിക്കുന്നത് വന്‍ വികസന സാധ്യതകളാണ്.