സ്വർണ്ണകടത്തു കേസിൽ സർക്കാർ നടപടി തുടങ്ങി

തിരുവനന്തപുരം: ഇന്നലെ പത്ര സമ്മേളനത്തിൽ പറഞ്ഞപോലെ തന്നെ കുറ്റക്കാർ ആരായാലും സംരക്ഷിക്കില്ല എന്ന മുഖ്യമന്ത്രി പിണറായി വിജയൻറെ വാക്കുകൾ വെറും വാക്കയില്ല. ഇരുട്ടി വെളുത്തപ്പോൾ തന്നെ മുഖ്യമന്ത്രിയുടെ സെക്രട്ടറി സ്‌ഥാനത്ത്‌ നിന്ന്‌ എം ശിവശങ്കർ ഐഎഎസിനെ മാറ്റി.പകരം മീർ മുഹമ്മദിന്‌ അധിക ചുമതല നൽകി. നയതന്ത്ര പരിരക്ഷയുള്ള ബാഗേജ്‌ വഴി സ്വർണ്ണം കടത്തിയ കേസിൽ ഉൾപ്പെട്ടവരുമായി ബന്ധമുണ്ടെന്ന്‌ ആരോപണമുയർന്നതിനെ തുടർന്നാണ്‌ മാറ്റിയത്‌.ഐ ടി സെക്രട്ടറി കൂടിയാണ്‌ എം ശിവശങ്കർ. അതെ സമയം സ്വർണക്കടത്തുമായി ബന്ധപ്പെട്ട് മുഖ്യമന്ത്രിയുടെ ഓഫീസിൽ നിന്ന് ആരും വിളിച്ചിട്ടില്ലെന്ന് കസ്റ്റംസ്. കസ്റ്റംസ് ജോയിന്റ് കമീഷണർ അനീഷ് ബി രാജനാണ് ഇക്കാര്യം വ്യക്തമാക്കിയത്. കൊച്ചിയിൽ മാധ്യമപ്രപവർത്തകരുടെ ചോദ്യത്തോട് പ്രതികരിക്കുകയായിരുന്നു അദ്ദേഹം. കസ്റ്റംസിന്റെ സ്ഥിരീകരണത്തോടെ സർക്കാരിനെതിരെ പ്രതിപക്ഷം ഉന്നയിച്ച ആരോപണങ്ങളുടെ മുനയൊടിയുകയാണ്. ബിജെപി സംസ്ഥാന അധ്യക്ഷൻ കെ സുരേന്ദ്രനും പത്രസമ്മേളനം വിളിച്ചുകൂട്ടി ഇതേ ആരോപണം ഇന്നലെ ഉന്നയിച്ചിരുന്നു.