അന്വേഷണ പരിധിയിലേക്ക് ഗൂഡാലോചന

കഴിഞ്ഞ യുഡിഎഫ് സര്‍ക്കാരിന്റെ അവസാന വര്‍ഷത്തില്‍ സോളാര്‍ ഇടപാട് പൊട്ടിപ്പുറപ്പെട്ട അതേ രീതിയിലാണ് ഇത്തവണത്തെ സ്വര്‍ണക്കടത്ത് വിവാദവും എന്നത് ശ്രദ്ധേയമാണ്. ഭാവിയുടെ ഇന്ധനമെന്ന പ്രത്യേകതയാണ് സൗരോര്‍ജത്തിനുണ്ടായിരുന്നത്. ആ മേഖലയില്‍ കേരളം നടത്താനിരുന്ന വലിയ കുതിപ്പാണ് സരിത നായര്‍ എന്ന വിവാദ വനിതയിലേക്ക് കാര്യങ്ങള്‍ കേന്ദ്രീകരിച്ചപ്പോള്‍ സംഭവിച്ചത്. കൊവിഡ് അനന്തരകാലത്ത് സംസ്ഥാനത്തിന് ഏറ്റവും കരുത്ത് പകരാന്‍ കെല്പുണ്ടെന്ന് കരുതപ്പെട്ടിരുന്ന മേഖലകളിലൊന്നാണ് ഐടിയും അനുബന്ധ സംരംഭങ്ങളും. അതിനു നേതൃത്വം നല്‍കേണ്ട ഉദ്യോഗസ്ഥനാണ് സ്വര്‍ണക്കടത്തില്‍ ആരോപിതയായ വനിതയ്ക്ക് നിയമനം നല്‍കിയതിന്റെ പേരില്‍ പുറത്തുപോകേണ്ടിവന്നത്. ഇത്തരം ആരോപണങ്ങള്‍ ഉയരുന്നത് കേവലം യാദൃച്ഛികമാണോ, അതോ മറ്റെന്തെങ്കിലും ഗുഢപദ്ധതിയുടെ ഭാഗമാണോ എന്നതും പരിശോധിക്കേണ്ടതുണ്ട്. കേരളത്തിലെ വ്യവസയങ്ങള്‍ക്ക് പാരവയ്ക്കാന്‍ വലകളികള്‍ നടക്കുന്നുണ്ടെന്ന് മുഖ്യമന്ത്രി തന്നെ കഴിഞ്ഞ ദിവസമാണ് വെളിപ്പെടുത്തിയത് . സ്വര്‍ണക്കടത്ത് കേസിന്റെ ഒരറ്റം മാത്രമേ ഇപ്പോള്‍ പുറത്തുവന്നിട്ടുള്ളൂ. അതില്‍ സര്‍ക്കാരിനോ, ഉദ്യോഗസ്ഥര്‍ക്കോ പങ്കുള്ളതായി ആരോപണമോ, സൂചനയോ ഇല്ല. അക്കാര്യത്തില്‍ ഒപ്പമുള്ള ഉദ്യോഗസ്ഥവൃന്ദമാണ് സര്‍ക്കാരിനെ സംരക്ഷിക്കേണ്ടത്. അവരുടെ വ്യക്തിപരമായ സൗഹൃദങ്ങള്‍ മറയാക്കി ആരെങ്കിലും കുറ്റകരമായ കാര്യങ്ങളില്‍ ഏര്‍പ്പെടുന്നുണ്ടോയെന്ന സംശയം എപ്പോഴുമുണ്ടാകണം. അത്തരം ഗൂഡാലോചനകളിലേക്കാണ് സംസ്ഥാന സര്‍ക്കാര്‍ അന്വേഷണം നടത്തേണ്ടത്.