സമരം ചെയ്യാം പക്ഷെ

 

നാട്ടില്‍ മരണം വ്യാപിക്കണം എന്നാരും ആഗ്രഹിക്കാന്‍ പാടില്ല. നമുക്ക് മാത്രമായി പ്രതിരോധത്തിന്റെ കവചകുണ്ഡലങ്ങളില്ലെന്ന് കോവിഡ് നിയന്ത്രണങ്ങള്‍ ലംഘിച്ച് തെരുവിലിറങ്ങുന്നവര്‍ ഓര്‍ക്കണമെന്ന് മുഖ്യമന്ത്രി പിണറായി വിജയന്‍. കോവിഡ് പ്രോട്ടോകോളൊന്നും തങ്ങള്‍ക്ക് ബാധകമല്ലെന്ന് പ്രഖ്യാപിച്ച് ഒരു നേതൃനിരതന്നെ സമരത്തിലേക്ക് വരുന്നതിന്റെ അര്‍ഥമെന്താണ്. സമരം ചെയ്യാനുള്ള ആരുടെയും അവകാശത്തെ ചോദ്യംചെയ്യുന്നില്ല. പക്ഷേ, ഒരു മഹാമാരി നമ്മളെ ആക്രമിക്കുകയാണ്. ഇത്തരം സമരങ്ങള്‍ നടത്തുന്നവര്‍ നാടിന്റെ അവസ്ഥ കണക്കിലെടുക്കണം. അല്ലെങ്കില്‍ പ്രത്യാഘാതം വലുതാകും. സുരക്ഷാ മുന്‍കരുതലുകളെയും നിയന്ത്രണങ്ങളെയും കൂട്ടാക്കാതെയുള്ള സമരങ്ങളെ പ്രോത്സാഹിപ്പിക്കുന്നതും നേതൃത്വം നല്‍കുന്നതും കുറ്റകരമാണെന്ന് ഓര്‍ക്കണം. അടുത്ത ഘട്ടത്തിലേക്ക് പോയാല്‍ വളരെ പ്രതിസന്ധിയാകും. തീരദേശ മേഖലയില്‍ അത്യന്തം ഉല്‍ക്കണ്ഠയുണ്ട്. ഇതിലും മോശമായ അവസ്ഥയുണ്ടായ രാജ്യങ്ങള്‍ പിടിച്ചുനിന്നത് ഒന്നിച്ചു നിന്നതുകൊണ്ടാണ്. നമുക്കതിന് കഴിയുമെന്ന് നേരത്തേ തെളിയിച്ചതാണ്. സുനാമി വന്ന ഘട്ടത്തില്‍ പ്രതിപക്ഷത്തായിരുന്ന എല്‍ഡിഎഫ് പ്രക്ഷോഭമാകെ നിര്‍ത്തിവച്ച് ദുരിതാശ്വാസവുമായി സഹകരിച്ചു. മനുഷ്യസ്നേഹപരമായി ചിന്തിക്കുന്ന ഏത് പ്രസ്ഥാനവും സ്വീകരിക്കുന്ന നിലപാടാണിത്. വളരെ മെച്ചപ്പെട്ട സൗകര്യങ്ങളുള്ള വികസിത രാജ്യങ്ങളില്‍വരെ കോവിഡ് വ്യാപത്തിന്റെ ദുരവസ്ഥ നാം കണ്ടതാണ്. കിടക്കയില്ലാതെ വന്നു. വെന്റിലേറ്ററുകള്‍ ലഭ്യമല്ലാതായി. ആശുപത്രികള്‍ രോഗകേന്ദ്രങ്ങളായി. ആരോഗ്യപ്രവര്‍ത്തകരും ഡോക്ടര്‍മാരും രോഗം ബാധിച്ച് മരിച്ചു. മൃതദേഹങ്ങള്‍ കുഴിച്ചിടാന്‍പോലും ബുദ്ധിമുട്ടായി. മറ്റിടങ്ങളിലെ കാഴ്ചകളുടെ ചെറിയ ഭാഗം ഇവിടെ വന്നാല്‍ എന്തായിരിക്കും സ്ഥിതിെ. മാസ്‌ക് ധരിച്ചാല്‍ എല്ലാമായെന്ന് കരുതരുത് മാസ്‌ക് ധരിച്ചതുകൊണ്ട് എല്ലാമായെന്ന് കരുതരുതെന്ന് മുഖ്യമന്ത്രി പിണറായി വിജയന്‍ ഓര്‍മിപ്പിച്ചു. ശാരീരിക അകലം പാലിച്ചില്ലെങ്കില്‍ മാസ്‌ക് ധരിച്ചതുകൊണ്ട് ഗുണവുമുണ്ടാകില്ല. ശാരീരിക അകലം പാലിക്കുക, കൈകള്‍ നിരന്തരം വൃത്തിയാക്കുക, മാസ്‌ക് ധരിക്കുക എന്നീ മൂന്നു കാര്യങ്ങളും ഒരേ സമയം പാലിച്ചാലേ രോഗത്തെ പ്രതിരോധിക്കാനാകൂ. രോഗവ്യാപനതോത് കുറയ്ക്കാന്‍ ഇതേ മാര്‍ഗമുള്ളൂ. ബ്രേക്ക് ദ ചെയിന്‍ പ്രചാരണം കൂടുതല്‍ ശക്തമായി മുന്നോട്ടു കൊണ്ടുപോകാനും ശാരീരിക അകലം കര്‍ശനമായി പാലിക്കാനും തയ്യാറാകണമെന്ന് മുഖ്യമന്ത്രി അഭ്യര്‍ഥിച്ചു.