ജയഘോഷിന്റെ സംരക്ഷകന്‍ ഏത് ഉന്നതന്‍

  ആത്മഹത്യക്ക് ശ്രമിച്ച ഗണ്‍മാന്‍ ജയഘോഷ് വിമാനത്താവളത്തില്‍ കാലുറപ്പിച്ചത് പൊലീസ് അസോസിയേഷനിലെ യുഡിഎഫ് അനുകൂല നേതാക്കളുടെ പിന്‍ബലത്തിലാണെനനും പുറത്തുവന്നിട്ടുണ്ട്. ഇയാളെ ഈ പോസ്റ്റുകളില്‍ എത്തിക്കാന്‍ ചരടുവലിച്ച പ്ജ്ഞാനികളെക്കുറിച്ച് അന്വേഷണം ആരംഭിച്ചു കഴിഞ്ഞു. കോണ്‍സുലേറ്റുമായി ബന്ധപ്പെട്ട ചില വിവരം തേടലില്‍ ഇയാള്‍ ചില കാര്യങ്ങള്‍ ആദ്യം മറച്ചു വച്ചിരുന്നു. മേയ് മാസത്തില്‍ ഐ ബി യും സ്‌പെഷ്യല്‍ ബ്രാഞ്ചുമാണ് അത് നടത്തിയത്. അന്ന് മറച്ചു വച്ച കാര്യങ്ങള്‍ പലതും ആത്മഹത്യ ശ്രമത്തിനുശേഷം ഇയാള്‍ സ്റ്റേറ്റ് പൊലീസിനോട് വെളിപ്പെടുത്തിയിട്ടുണ്ട്. തുടര്‍ന്നാണ് ഇയാളുടെ സ്‌പോണ്‍സറിലേക്ക് അന്വേഷണം നീണ്ടിരിക്കുന്നത്. 2011ല്‍ യുഡിഎഫ് സര്‍ക്കാര്‍ വന്നതോടെയാണ് ജയഘോഷ് ക്യാമ്പിലെ ഡ്യൂട്ടിയില്‍നിന്ന് തിരുവനന്തപുരം വിമാനത്താവളത്തിലെ എമിഗ്രേഷന്‍ വിഭാഗത്തിലെത്തുന്നത്. ഇതിന് യുഡിഎഫ് അനുകൂല പൊലീസ് അസോസിയേഷന്‍ നേതാക്കളുടെ പിന്‍തുണയോടെയാണ് . പിന്നീട് പൊലീസിലെ അടക്കം പല ഉന്നതരുടെയും അടുപ്പക്കാരനായി ഇയാള്‍. വിമാനത്താവളത്തിലെത്തുന്നവര്‍ക്ക് വേണ്ടുന്ന സഹായങ്ങളെല്ലാം ലഭ്യമാക്കിയായിരുന്നു അടുപ്പം ഉറപ്പിക്കല്‍. പിന്നീട് കോണ്‍സുലേറ്റ് ഗണ്‍മാന്‍ എന്ന അധിക ഡ്യൂട്ടിയില്ലാത്ത നിയമനവും ജയഘോഷ് അവിടെ നിന്ന് ഉറപ്പാക്കി. ഇന്തരം നിയമനങ്ങള്‍ സാധാരണ നടക്കുന്നതിനായതിനാല്‍ സര്‍ക്കാര്‍ പ്രത്യേക ശ്രദ്ധഇക്കാര്യങ്ങളില്‍ കൊടുത്തിരുന്നില്ല. ജയഘോഷിനെ ഐബി, കസ്റ്റംസ് സംഘം ചോദ്യം ചെയ്തു. ചികിത്സയില്‍ കഴിയുന്ന സ്വകാര്യാശുപത്രിയില്‍ എത്തിയാണ് ചോദ്യം ചെയ്തത്. കഴിഞ്ഞദിവസം മജിസ്ട്രേറ്റ് ഇയാളുടെ രഹസ്യമൊഴി രേഖപ്പെടുത്തിയിരുന്നു. സരിത്ത്, സന്ദീപ്, സ്വപ്ന, അറ്റാഷെ എന്നിവരുമായി ജയഘോഷ് നിരന്തരം ബന്ധപ്പെട്ടതായി വിവരം ലഭിച്ചിരുന്നു. വിമാനത്താവളത്തില്‍ സ്വര്‍ണം പിടിച്ചെടുത്ത ദിവസവും ഇവരെ വിളിച്ചിട്ടുണ്ട്. സ്വര്‍ണക്കടത്ത് സംഘം തന്നെ വധിക്കുമെന്ന് ഭീഷണിപ്പെടുത്തിയതായി ജയഘോഷ് പറഞ്ഞിരുന്നു. ഇതിന്റെ അടിസ്ഥാനത്തിലായിരുന്നു ചോദ്യം ചെയ്യല്‍. സരിത്ത് ഉള്‍പ്പെടെയുള്ളവരുമായുള്ള ബന്ധം, ഭീഷണിപ്പെടുത്തിയവരുടെ വിവരങ്ങള്‍ എന്നിവ ശേഖരിച്ചു. ഇയാളെ പിന്നീട് വിശദമായി ചോദ്യം ചെയ്യും.