രണ്ടായിരം കോടി രൂപയുടെ വികസന പദ്ധതി
കേരളത്തിന്റെ അടിസ്ഥാന സൗകര്യ വികസനത്തിനായുള്ള 2002.72 കോടി രൂപയുടെ പദ്ധതികള്ക്ക് കിഫ്ബി അംഗീകാരം നല്കി. കൊച്ചി-ബെംഗലൂരു വ്യാവസായിക ഇടനാഴിയിലും തീരദേശ ഹൈവേയിലും ഉള്പ്പെട്ട പദ്ധതികള് അനുമതി നല്കിയവയില് ഉള്പ്പെടുന്നു. ജൂണ് 29-ന് നടന്ന എക്സിക്യൂട്ടീവ് കമ്മിറ്റി യോഗത്തില് 1530,32 കോടി രൂപയുടെ 55 പദ്ധതികള്ക്ക് അനുമതി നല്കിയിരുന്നു. ജൂണ് 30-ന് നടന്ന പൊതുയോഗം 472.40 കോടി രൂപയുടെ പദ്ധതികള്ക്കും അനുമതി നല്കി. സംസ്ഥാനത്തെ മിക്കവാറും എല്ലാ അടിസ്ഥാന സൗകര്യ വികസന പദ്ധതികളിലും കിഫ്ബിയുടെ കയ്യൊപ്പു ചാര്ത്തും വിധമാണ് പ്രവര്ത്തനങ്ങള് നടന്നു വരുന്നത്. വികസന പ്രക്രിയയില് നേരിട്ടു പങ്കാളികളാകാന് പ്രവാസികള്ക്ക് അവസരം നല്കുന്ന ഡയസ്പോറ ബോണ്ട് നിര്ദ്ദേശത്തിനും ഐഎഫ്സിയില് നിന്ന് 1100 കോടി രൂപ വായ്പയെടുക്കാനുള്ള നിര്ദ്ദേശത്തിനും യോഗം അംഗീകാരം നല്കി.
അഴീക്കോട്- മുനമ്പം പാലം, പെരുമാട്ടി-പട്ടഞ്ചേരി കുടിവെള്ള പദ്ധതിയുടെ മൂന്നാം ഘട്ടം, കോരയാര് മുതല് വരട്ടയാര് വരെയുള്ള മൂലന്തറ വലതുകര കനാല് വിപുലീകരണം തുടങ്ങിയ പദ്ധതികള്ക്കാണ് ധനാനുമതി നല്കിയത്.
.
കൊച്ചി-ബെംഗലൂരു വ്യാവസായിക ഇടനാഴി
കേന്ദ്ര സര്ക്കാര് അംഗീകരിച്ച വ്യാവസായിക ഇടനാഴികളില് ഒന്നായ കൊച്ചി- ബെംഗലൂരു വ്യാവസായിക ഇടനാഴിയുടെ സ്ഥലം ഏറ്റെടുക്കലിനായി 1030.80 കോടി രൂപയാണ് അനുവദിച്ചത്. പാലക്കാട് ജില്ലയില് ദേശീയപാതയോടു ചേര്ന്ന് പുതുശ്ശേരി, ഒഴലപ്പതി എന്നിവിടങ്ങളില് 1350 ഏക്കര് ഭൂമി ഏറ്റെടുക്കും. സംസ്ഥാനത്തെ വ്യാവസായിക വികസനത്തിന് വന് കുതിപ്പായിരിക്കും ഈ പദ്ധതിയിലൂടെ ഉണ്ടാക്കുക.
അഴീക്കോട് - മുനമ്പം പാലത്തിന് 140 കോടി രൂപ
തൃശൂര്-എറണാകുളം ജില്ലകളെ ബന്ധിപ്പിക്കുന്ന അഴീക്കോട്-മുനമ്പം പാലത്തിന് 140-01 കോടി രൂപയാണ് അനുവദിച്ചത്. ദേശീയപാത 66, 544 എന്നിവയിലെ ഗതാഗതക്കുരുക്കിനു പരിഹാരമേകുന്നതാണ് നിര്ദ്ദിഷ്ട പാലം. ഏഴു തീരദേശ ജില്ലകളെ ബന്ധിപ്പിക്കുന്ന തീരദേശ ഹൈവേയുടെ അലൈന്മെന്റില് ഉള്പ്പെട്ടതാണ് ഈ പാലം. വിനോദ സഞ്ചാര മേഖലയ്ക്കും ഈ പാലം ഗുണകരമാകും. ഫുട്പാത്തും സൈക്കിള് ട്രാക്കും ഉള്പ്പെടെ 15.1 മീറ്റര് വീതിയിലാവും പാലം നിര്മിക്കുക.
ജലവിതരണ പദ്ധതിക്കും ഊന്നല്
പാലക്കാട് ജില്ലയിലെ പെരുമാട്ടി, പട്ടഞ്ചേരി. എലപ്പുള്ളി, നല്ലേപ്പുള്ളി എന്നിവിടങ്ങളിലേക്കുള്ള ജലവിതരണ പദ്ധതിയുടെ മൂന്നാം ഘട്ടത്തിന് 77.21 കോടി രൂപയാണ് അനുവദിച്ചിട്ടുള്ളത്. മീനാക്ഷീപുരത്ത് ജല ശുചീകരണ പ്ലാന്റ്, സംഭരണി, 350 കിലോമീറ്റര് വിതരണ പൈപ്പുകള് തുടങ്ങിയവ അടങ്ങുന്നതാണ് പദ്ധതി.
ജലസേചനത്തിനായി 255 കോടി രൂപ
പാലക്കാട് ജില്ലയിലെ ചിറ്റൂര് കോഴിപ്പതി, എരുത്തിയാംപതി എന്നിവിടങ്ങള്ക്കു വന് പ്രയോജനം ചെയ്യുന്ന മൂലത്തറ വലതുകര വികസനത്തിന് 255.18 കോടി രൂപയാണ് അനുവദിച്ചത്. കോരയാര് മുതല് വരട്ടയാര് വരെയായിരിക്കും ഇതിലൂടെ ജലസേചന സൗകര്യം. കൊടും വരള്ച്ചയും ശരാശരിയിലും കുറഞ്ഞ മഴയും മൂലം ബുദ്ധിമുട്ടനുഭവിക്കുന്ന പ്രദേശങ്ങളാണിത്.
ഏഴംകുളം-കൈപ്പട്ടൂര് റോഡിന് 41 കോടി രൂപ
പത്തനംതിട്ട ജില്ലയിലെ ഏഴംകുളം-കൈപ്പട്ടൂര് റോഡ് മെച്ചപ്പെടുത്താനായി 41.18 കോടി രൂപയാണ് അനുവദിച്ചിട്ടുള്ളത്. ദേശീയപാത 183 എയിലെ പത്തനാപുരത്തേക്കുള്ള ഗതാഗതം കൈപ്പട്ടൂരില് നിന്നു തിരിച്ചു വിടാന് പദ്ധതി വഴി സാധിക്കും. നിലവിലുള്ള ഒരു പാലം പൊളിച്ചു നീക്കി പുതിയതു പണിയുന്നത് അടക്കമുള്ള പദ്ധതിക്കാണ് അനുമതി. അടൂര് പട്ടണത്തിലെ ഗതാഗതത്തിരക്കു കുറക്കാനും പദ്ധതി സഹായകമാകും.
രാമക്കല്മേട് - കമ്പംമെട്ട്- വണ്ണപുരം റോഡിന് 73.21 കോടി രൂപ
വിനോദ സഞ്ചാരകേന്ദ്രങ്ങളായ ഇടുക്കി ജില്ലയിലെ രാമക്കല്മേട്, കല്ലാര്, കമ്പംമേട്, നെടുങ്കണ്ടം എന്നിവിടങ്ങളെ ബന്ധിപ്പിക്കുന്ന റോഡിനായി 73.21 കോടി രൂപയാണ് അനുവദിച്ചിട്ടുള്ളത്. 28.1 കിലോമീറ്റര് ദൈര്ഘ്യമാണ് നിര്ദ്ദിഷ്ട റോഡിനുള്ളത്.
പൊന്നാനി നിളാതീരം അക്വാറ്റിക് കോംപ്ലക്സിന് 14.09 കോടി രൂപയും തലശ്ശേരി പൈതൃക പദ്ധതിക്ക് 41.38 കോടി രൂപയും അനുവദിച്ചിട്ടുണ്ട്. തലശ്ശേരി കേന്ദ്രബിന്ദുവായി കണ്ണൂര്, കോഴിക്കോട്, വയനാട് ജില്ലകളിലെ പൈതൃക നിര്മിതികളെ സംരക്ഷിക്കുകയും അവയുടെ ചരിത്രം പുതുതലമുറയ്ക്കും വിനോദ സഞ്ചാരികള്ക്കും മുന്നില് അവതരിപ്പിക്കുകയും ചെയ്യുന്നതാണ് തലശ്ശേരി പൈതൃക പദ്ധതി.
ചെത്തി ബീച്ച് വികസിപ്പിക്കാന് 21 കോടി രൂപ
തെക്കന് കേരളത്തിലെ ഏറ്റവും മികച്ച ബീച്ചുകളിലൊന്നായി മൂന്നു കിലോമീറ്റര് നീളമുള്ള ചെത്തി ബീച്ചിനെ മാറ്റുവാനുള്ള പദ്ധതിക്ക് 21.36 കോടി രൂപയാണ് അനുവദിച്ചിരിക്കുന്നത്. സ്പോര്ട്ട്, ആക്ടിവിറ്റി, ഫാമിലി എന്നിങ്ങനെ മൂന്നു സോണുകളായി തിരിച്ചാണ് ബീച്ച് വികസിപ്പിക്കുക.
എംജി സര്വ്വകലാശാലയിലെ അടിസ്ഥാന സൗകര്യ വികസനത്തിന് 50.28 കോടി രൂപ, തിരുവനന്തപുരം യൂണിവേഴ്സിറ്റി കോളേജിലെ അടിസ്ഥാന സൗകര്യ വികസനത്തിന്റെ ഒന്നാം ഘട്ടത്തിനായി 20.27 കോടി രൂപ, കാസര്കോട് ജില്ലയിലെ മഞ്ചേശ്വരം ഹോസനഗഡി റെയില്വേ മേല്പ്പാലത്തിന് 40.40 കോടി രൂപ എന്നിങ്ങനെയും അനുവദിച്ചിട്ടുണ്ട്.
